லோகி தோட்டப் பாதையை புனரமைக்குமாறு கோரிக்கை

கொட்டகலை பிரதேச சபைப் பிரிவுக்குட்பட்ட லோகி தோட்டத்துக்கான பாதை, கடந்த பல ஆண்டுகளாகச் செப்பனிடப்படாமையால், குறித்த  பாதையைப் போக்குவரத்துக்குப் பயன்படுத்த முடியாத நிலை ஏற்பட்டுள்ளதென, பிரதேச மக்கள் தெரிவித்தனர்.

இந்தப் பாதையைச் செப்பனிடுவதற்காக அடிக்கல் நாட்டப்பட்டு 2 ஆண்டுகள் கடந்துள்ள போதிலும்கூட, பாதை இதுவரை செப்பனிடப்படவில்லை என்று சுட்டிக்காட்டும் மக்கள், பாதை அபிவிருத்திக்காக ஒதுக்கப்பட்ட நிதிக்கு என்ன நடந்தது என்றும், சம்பந்தப்பட்ட அதிகாரிகளிடம் கேள்வி எழுப்பியுள்ளனர்.

ஹட்டன் - நுவரெலியா பிரதான வீதி, தலவாக்கலை மல்லியப்பூ கதிரேசன் கோவிலுக்கு அருகில் இருந்து, லோகி தோட்டம் வரை செல்லும் சுமார் 3 கிலோமீற்றர் தூரமுடைய பாதையே, புனரமைப்பின்றிக் காணப்படுவதாகச் சுட்டிக்காட்டப்படுகிறது.