மக்கள் சக்தி பயன்படுத்தப்படும்: அரசாங்கத்துக்கு ரணில் எச்சரிக்கை

கொழும்பு மாநகர சபையின் நிர்வாகத்தை பலவீனப்படுத்த மத்திய அரசாங்கம் முயற்சித்தால் 'மக்கள் சக்தி' பயன்படுத்தப்படும் என எதிர்க்கட்சித் தலைவரும் ஐ.தே.க. தலைவருமான ரணில் விக்கிரமசிங்க கூறினார்.

அண்மையில் நடைபெற்ற உள்ளூராட்சித் தேர்தலில் கொழும்பு மாநகர சபையை ஐ.தே.க. கைப்பற்றியமை குறிப்பிடத்தக்கது.

தெவட்டகஹா பள்ளிவசாலில் சமய வழிபாடுகளில் கொழும்பு மாநகர மேயர் ஏ.ஜே.எம். முஸம்மில் சகிதம் பங்குபற்றிய எதிர்க்கட்சித் தலைவர் ரணில் விக்கிரமசிங்க, மக்கள் ஆணை வழங்கப்பட்டுள்ளதால் கொழும்பு மாநகர சபையை உரிய முழு அதிகாரங்களுடன் ஐ.தே.க ஆட்சி நடத்துவதற்கு அனுமதிக்கப்பட வேண்டும் எனக் கூறினார்.

குறைந்த வருமானம் பெறும் குடியிருப்பாளர்கள் மற்றும் முச்சக்கர வாகனசாரதிகள் ஆகியோரை பாதுகாப்பதற்கு ஐ.தே.கவுக்கு மக்கள் ஆணை வழங்கப்பட்டுள்ளது எனவும் மக்களின் விருப்பத்தை நிறைவேற்றுவதற்கான நடவடிக்கைகளை நதமது கட்சி மேற்கொள்ளும் எனவும் அவர் கூறினார்.

'குறைந்த வருமானம் பெறுபவர்களின் வீடுகளை தகர்ப்பதற்கும், நகரிலிருந்து முச்சக்கர வாகனங்களை அகற்றுவதற்கும் ஆதரளிக்கும் சக்திகள் உள்ளன. நாம் அவர்களை எதிர்கொள்வோம்' என ரணில் தெரிவித்தார்.