சிறுத்தை தோல் வைத்திருந்ததாகவும் 'மெடம் ஜீனா' மீது குற்றச்சாட்டு

(லக்மால் சூரியகொட)

கொள்ளுபிட்டி விபசார விடுதியொன்றை நடத்திய குற்றச்சாட்டில் கைது செய்யப்பட்ட 'மெடம் ஜீனா' என அழைக்கப்படும் ரோஸ்மேரி பெலிஸியா பெரேரா, அனுமதியின்றி சிறுத்தையின் தோல் ஒன்றை வைத்திருந்ததாகவும் குற்றம் சுமத்தப்பட்டுள்ளார்.

ரோஸ்மேரி பெலிஸியா பெரேரா மீதான வழக்கு விசாரணை நேற்று கொழும்பு கோட்டை நீதவான் லங்கா ஜயரட்ன முன்னிலையில் விசாரணைக்கு எடுத்துக்கொள்ளப்பட்டபோது, மேற்படி விபசார விடுதியில் முற்றுகை நடத்திய புலனாய்வு அதிகாரி இதை நீதிமன்றத்தில் தெரிவித்தார்.

வர்த்தக கட்டிடத் தொகுதியிலுள்ள 8 ஆவது மாடியிலிருந்து அவ்விபசார விடுதியை முற்றுகையிட்டபோது அங்கிருந்து சிறுத்தை தோலை தாம் கைப்பற்றியதாக சப் இன்ஸ்பெக்டர் ஜனக் டி சில்வா கூறினார்.

மேற்படி விடுதியில் பெண்களை விபசாரத்திற்கு வழங்கிய குற்றச்சாட்டில் ரோஸ்மேரி பெலிஸியா பெரேரா உட்பட 14 பேர் கைது செய்யப்பட்டமை குறிப்பிடத்தக்கது.