நல்லூர் மகோற்சவப் பெருவிழா; ஆலயத்தை வந்தடைந்தது கொடிச்சீலை

எம்.றொசாந்த், எஸ்.நிதர்ஷன்

நல்லூர் கந்தசுவாமி ஆலயத்தின் வருடாந்த மகோற்சவப் பெருவிழா, நாளை (16) கொடியேற்றத்துடன் ஆரம்பமாகவுள்ள நிலையில், கொடியேற்றத்துக்கான கொடிச்சீலை எடுத்துவரும் நிகழ்வு, இன்று (15) நடைபெற்றது.

இதற்கமைய, யாழ்ப்பாணம் சட்டநாதர் சிவன் ஆலயத்துக்கு அருகில் உள்ள வேல்மடம் முருகன் ஆலயத்தில், நேற்றுக் காலை 9 மணிக்கு நடைபெற்ற விசேட பூஜை, வழிபாடுகளைத் தொடர்ந்து, அங்கிருந்து சிறிய இரதத்தின் மூலம், நல்லூர் கந்தசுவாமி ஆலயத்துக்கு கொடிச்சீலை கொண்டவரப்பட்டது.

அதைத் தொடர்ந்து, அங்கு ஆலயத்தின் வெளி வீதி உலாச் சென்று, சுபநேரத்தில் பூஜைகள் இடம்பெற்று, நல்லூர் ஆலயப் பிரதம குருக்களிடம் கொடிச்சீலை கையளிக்கப்பட்டது.

நல்லூர் கந்தசுவாமி ஆலயத்தின் மகோற்சவப் பெருவிழா, நாளை(16) காலை 10 மணிக்கு கொடியேற்றத்துடன் ஆரம்பமாகும். தொடர்ந்து 25 நாள்கள் மகோற்சவப் பூஜைகள் இடம்பெற்று, எதிர்வரும் 08ஆம் திகதி தேர்த் திருவிழாவும் 09ஆம் திகதி தீர்தத் திருவிழாவும் இடம்பெறவுள்ளமை குறிப்பிடத்தக்கது