போதையில் இருந்தவர் வைத்தியசாலையில் அட்டகாசம்

யாழ்ப்பாணம் போதனா வைத்தியசாலையில் நிறை போதையில் சிகிச்சை பெற வந்த ஒருவர் , பாதுகாப்பு உத்தியோகத்தர்களுடன்  முரண்பட்டு அவர்கள் மீது கத்தி குத்து தாக்குதல் நடத்தி அங்கிருந்து தப்பி சென்றுள்ளார். 

போதனா வைத்தியசாலைக்கு புதன்கிழமை (14)  அதிகாலை 1.40 மணியளவில் நிறை போதையில் இரத்த காயங்களுடன்  சிகிச்சைக்காக அனுமதிக்கப்பட்ட  குறித்த நபர் தாதியர்களிடம் முரண்பட்டு , தூஷண வார்த்தைகளை பேசி , ஏனைய நோயாளர்களுக்கும் சிரமங்களை ஏற்படுத்தும் விதமாக நடந்து கொண்டுள்ளார். 

இது தொடர்பாக பாதுகாப்பு  உத்தியோகத்தர்களுக்கு அறிவிக்கப்பட்டதையடுத்து பாதுகாப்பு  உத்தியோகத்தர்கள்  அவ்விடத்திற்கு, விரைந்து குறித்த நபரை கட்டுப்படுத்த முயன்ற நிலையில் குறித்த நபர் தனது உடைமையில் மறைத்து வைத்திருந்த கத்தியை எடுத்து , அச்சுறுத்தியுள்ளார். 

பின்னர் அவரை மடக்கி பிடிக்க முற்பட்ட போது  குறித்த நபர் தாக்கியதில் ஒரு உத்தியோகத்தருக்கு கைகளில் காயம் ஏற்பட்டுள்ளதுடன் தாக்குதலை நடத்தியவர் அங்கிருந்து தப்பியோடியுள்ளார்.

சம்பவம் தொடர்பில் யாழ்ப்பாண பொலிஸ் நிலையத்தில் முறைப்பாடு செய்யப்பட்டுள்ளது. 

நிதர்ஷன் வினோத்