புலம்பெயர் மக்களுக்கு சான்றிதழ்கள் வழங்கும் நடமாடும் சேவை

 எஸ்.றொசேரியன் லெம்பேட்

புலம்பெயர்ந்து நாடு திரும்பிய மக்களுக்கு, தூதரகப் பிறப்புச் சான்றிதழ், குடியுரிமைச் சான்றிதழ் பெற்றுக் கொள்ளுவதற்கான நடமாடும் சேவை, மன்னார் நகர மண்டபத்தின் கலாசார மண்டபத்தில், இன்று (12) காலை 9 மணியளவில் ஆரம்பமாகியது.

மன்னார் மாவட்ட செயலகத்தின் ஏற்பாட்டில், இந்த நடமாடும் சேவை நடைபெறுகிறது.

இச்சேவை, இன்றுக் காலை 9 மணி முதல் மாலை 5 மணி வரை நடைபெறுவதுடன். அத்துடன், நாளையும் (13) காலை 8 மணி முதல் மாலை 5 மணி வரையும் குறித்த சேவைகள் இடம்பெறவுள்ளன.

மன்னார் மாவட்ட செயலாளர் சி.ஏ.மோகன்ராஸ் தலைமையில் ஆரம்பமான குறித்த நடமாடும் சேவையில், மன்னார்,நானாட்டான், முசலி, மாந்தை மேற்கு, மடு ஆகிய 5 பிரதேச செயலகப் பிரதேச செயலாளர்கள், கிராம அலுவலகர்கள், திணைக்கள அதிகாரிகள் ஆகியோர் கலந்துகொண்டனர்.

புலம்பெயர்ந்து சென்று மீண்டும் நாடு திரும்பி, மன்னார் மாவட்டத்தில் வசித்து வரும் மக்கள், குறித்த ஆவணங்களைப் பெற்றுக்கொள்வதில் பல்வேறு அசௌகரியங்களுக்கு முகங்கொடுத்து வந்தமை குறிப்பிடத்தக்கது