வீடொன்றின் மீது பெற்றோல் குண்டுத் தாக்குதல்

எம்.றொசாந்த், எஸ்.நிதர்ஷன், டி.விஜிதா 

யாழ் வைமன் வீதியில் உள்ள வீடொன்றின் மீது இன்று (29) அதிகாலை நடத்தப்பட்ட பெற்றோல் குண்டுத் தாக்குதலில் அந்த வீட்டின் முன்பாக நிறுத்திவைக்கப்பட்டிருந்த 2 முச்சக்கர வண்டிகள் தீயில் எரிந்தன. மோட்டார் சைக்கிள் இரண்டு அடித்துச் சேதமாக்கப்பட்டன.

8 பேர் கொண்ட வன்முறைக் கும்பல் ஒன்றே இந்த தாக்குதலை மேற்கொண்டுள்ளது.

ஆரியகுளம் சந்தி பகுதியில் வாகன திருத்தகம் வைத்திருக்கும் உரிமையாளர் ஒருவரின் வீட்டிலேயே குறித்த சம்பவம் இடம்பெற்றுள்ளது.

உரிமையாளர் நேற்று (28) இரவு 2 முச்சக்கர வண்டிகளை வீட்டில் கொண்டு வந்து விட்டுள்ளார்.

இன்று அதிகாலை 2 மணியளவில், பெரும் சத்தம் கேட்டதையடுத்து வீட்டு உரிமையாளர் வெளியே வந்து பார்த்த போது 8 பேர் முகமூடியுடன் வீட்டின் முன்னால் நின்றுள்ளனர்.

அந்தக் கும்பல் மேற்கொண்ட பெற்றோல் குண்டு தாக்குதலில் முச்சக்கரவண்டிகள் இரண்டும் தீ பற்றி எரிந்துள்ளன. மோட்டார் சைக்கிள்கள் இரண்டு சேதமாக்கப்பட்டுள்ளன. வீட்டின் கண்ணாடிகள் உடைக்கப்பட்டுள்ளன.

சம்பவம் தொடர்பாக யாழ்ப்பாணம் பொலிஸார் விசாரணைகளை மேற்கொண்டு வருகின்றனர்.