அரிசி கையிருப்பில் இல்லை; மதிய உணவு வழங்குவதில் சிரமம்

(கிரிசன்)

யாழ். மாவட்டத்திலுள்ள பல பாடசாலைகள் மாணவர்களுக்கான மதியநேர  உணவை வழங்குவதில் பெரும் சிரமத்தை எதிர்நோக்கியுள்ளன.

கடந்த பல வருடங்களாக யாழ். மாவட்ட பாடசாலைகளில் தரம் பத்து வரையான மாணவர்களுக்கு உலக உணவுத் திட்டத்தின் உதவியுடன் மதியநேர உணவு வழங்கப்பட்டு வருகின்றது. இருப்பினும் உலக உணவுத் திட்டத்தின் கீழ் வழங்கப்பட்ட அரிசி முடிவடைந்துள்ளமையால் பல பாடசாலைகள்  நாளை  திங்கட்கிழமை முதல் மதியநேர உணவு வழங்க முடியாத நிலைமைக்குள்ளாகியுள்ளன.

இதனால் ஆரம்பப் பிரிவு பாடசாலைகளினுடைய அதிபர்கள் நாளை திங்கட்கிழமை முதல் மதியநேர உணவை வீட்டிலிருந்து  கொண்டுவருமாறு மாணவர்களுக்கு அறிவித்துள்ளனர்.

கிராமப்புறப் பாடசாலைகளில் கல்வி கற்கும் மாணவர்கள் பலர் பாடசாலையில் வழங்கப்படும் மதியநேர உணவை நம்பியுள்ளனர். இந்நிலையில், எந்தவித  முன்னறிவித்தலுமின்றி பாடசாலைகள் மதியநேர உணவு வழங்குவதை நிறுத்தியுள்ளன. மதியநேர உணவை நிறுத்தியமையால் ஆயிரக்கணக்கான மாணவர்கள் பாதிப்படையும் நிலைமை ஏற்பட்டுள்ளதாக பாடசாலை  அதிபர்கள் தெரிவித்தனர்.

இதேவேளை உலக உணவுத் திட்டத்தின் கீழ் தொடர்புடைய அதிகாரிகள் இது சம்பந்தமாக கருத்துத் தெரிவிக்கையில், கையிலிருப்பிலிருந்த அரிசி முடிவடைந்துள்ளது. அரிசி வந்ததும் வழங்கப்படும் என்றனர்.