புத்தளம் பிரதேச எரிபொருள் நிரப்பு நிலையங்களில் எரிபொருளுக்கு தட்டுப்பாடு

(ஏ.எம்.எப்.ஜெஸீரா, எஸ்.எம்.மும்தாஜ்)

புத்தளம் பிரதேச எரிபொருள் நிரப்பு நிலையங்களில் இன்று பெற்றோலுக்கு தட்டுப்பாடு ஏற்பட்டதால் பலர் மிகுந்த அசௌகரியங்களுக்கு உள்ளாகினர்.

இன்று காலை தொழில்கள் நிமித்தம் மோட்டார் சைக்கிள்களில் சென்ற பலர் தமது பெற்றோல் நிரப்புவதற்காக எரிபொருள் நிரப்பு நிலையங்களுக்குச் சென்ற போது அங்கு தொங்கவிடப்பட்டிருந்த 'பெற்றோல் இல்லை' என்ற அறிவித்தலைப் பார்த்து மிகுந்த ஏமாற்றத்திற்குள்ளாகினர்.

மதுரங்குளி நகரிலுள்ள எரிபொருள் நிரப்பு நிலையங்களிலும் 'பெற்றோல் இல்லை' என்ற அறிவித்தல் தொங்கியதைக் காண முடிந்ததுடன் அங்குள்ள ஒரு நிலையத்தில் பெற்றோல் வழங்கப்பட்டதால் அங்கு பெற்றோல் பெற்றுக் கொள்வதற்காக மிக நீண்ட வரிசையில் மோட்டார் சைக்கிள்களும், முச்சக்கர வண்டிகளும் நின்றதையும் காண முடிந்தது. எனினும் மாலையுடன் அங்கும் 'பெற்றோல் இல்லை' என்ற அறிவித்தல் காணப்பட்டது.

இந்த நிலை காரணமாக பலர் தமது மோட்டார்  சைக்கிள்களை உருட்டிக் கொண்டு சென்றதையும், அருகில் இருந்த தெரிந்தவர்களின் வீடுகளில் நிறுத்திவிட்டு தமது பயணத்தை மேற்கொண்டதையும், தூர இடங்களுக்குச் செல்வோர் வீதியில் தவித்துக் கொண்டு நின்றதையும் காணமுடிந்தது.