கருவலகஸ்வெவ பிரதேச சபையின் முன்னாள் தலைவர் வைத்தியசாலையில் அனுமதி

-முஹம்மது முஸப்பிர்

கருவலகஸ்வெவ பிரதேச சபையின் முன்னாள் தலைவர் நீல் வீரசிங்க நிக்கவெரட்டிய வைத்தியசாலையில் சனிக்கிழமை அனுமதிக்கப்பட்டுள்ளார். 

காலஞ் சென்ற முன்னாள் அமைச்சர் த.மு.தசநாயக்காவின் ஆதரவுடன் 1997ஆம் ஆண்டு அரசியலில் நுழைந்த இவர், பின்னர் ஐக்கிய மக்கள் சுதந்திரக் கூட்டமைப்பின் சார்பில் கருவலகஸ்வௌ பிரதேச சபைத் தேர்தலில் போட்டியிட்டு வெற்றி பெற்றதோடு, கருவலகஸ்வெவ பிரதேச சபைத் தலைவராக இரு தடவைகள் பதவி வகித்து வந்துள்ளார்.

இந்நிலையில், கடந்த மாதம் 29ஆம் திகதி ஆனமடுவையில் இடம்பெற்ற ஐக்கிய தேசிய கட்சியில் தேர்தல் பிரசாரக் சுட்டத்தில் வைத்து பிரதமர் ரணில் விக்ரமசிங்க முன்னிலையில் அவர் ஐக்கிய தேசிய கட்சியில் இணைந்து கொண்டதோடு ஐக்கிய தேசிய கட்சியின் வெற்றிக்காக பிரசார நடவடிக்கைகளிலும் ஈடுபட்டு வந்துள்ளார்.

முன்னாள் பிரதேச சபைத் தலைவரான தன்னை ஐக்கிய மக்கள் சுதந்திர கூட்டமைப்பின் பிரதேச அரசியல் தலைவர்களோ, ஐக்கிய தேசியக் கட்சியின் பிரதேச அரசியல் தலைவர்களோ பெரிதாகப் பொருட்படுத்தவில்லை என்பதால் தான் மனவிரக்தி அடைந்ததாகவும் அதனையடுத்தே நஞ்சருந்தியதாகவும் தெரிவிக்கப்படுகின்றது.