தேசிய நெடுஞ்சாலைகள் விஸ்தரிப்புக்காக 3 பில்லியன் ரூபாவுக்கு அமைச்சரவை அங்கிகாரம்

3 பில்லியன் ரூபா செலவில் நாடளாவிய ரீதியில் காணப்படும் பல்வேறு நெடுஞ்சாலைகளை விஸ்தரிப்பு செய்யவும், புனரமைப்பதற்குமான அனுமதியை அமைச்சரவை வழங்கியுள்ளது. இந்த நிதி, வெவ்வேறு வங்கிகளின் ஊடாக பெற்றுக் கொள்ளப்படவுள்ளது.

 

இதற்காக ஹசலக- ஹந்துன்கமுவ-ஹெட்டிபொல வரையிலான 20 கிலோமீற்றர் வீதி 312 மில்லியன் ரூபா செலவிலும், கெலனிமுல்ல-முல்லேரியா-கொஸ்வத்த வரையிலான 60 கிலோமீற்றர் வீதி 539.2 மில்லியன் ரூபா செலவிலும், குருநாகல்-நாரம்மல-மாதம்பே வரையிலான 22 கிலோமீற்றர் வீதி 744 மில்லியன் ரூபா செலவிலும் மற்றும் சீதுவ – கட்டுநாயக்க வரையிலான 3.9 கிலோமீற்றர் வீதி 103 மில்லியன் ரூபா செலவிலும் அபிவிருத்தி செய்வதற்காக உள்ளடக்கப்பட்டுள்ளன. 

 

வடக்கில் பருத்தித்துறை – பொன்னாலை வரையிலான 3 கிலோமீற்றர் வீதியை புனரமைப்பதற்காக 200 மில்லியன் ரூபாவும் இந்த ஒதுக்கீட்டில் உள்ளடக்கப்பட்டுள்ளமை குறிப்பிடத்தக்கது.