பங்குச்சந்தை, தங்கம் விலை மற்றும் நாணயமாற்று வீத நிலைவரங்கள்

-ச.சேகர்

 

வங்கிகளின் வட்டி வீதங்கள் தொடர்ந்தும் சரிவான நிலையில் காணப்படுகின்றமையால், பங்குச்சந்தை முதலீடுகளின் மீது தொடர்ந்தும் அதிகளவு ஆர்வம் காணப்படுகின்றமையை அவதானிக்க முடிந்தது. தற்போது நிலவும் சூழலில் பங்குச்சந்தையில் முதலீடுகளை மேற்கொண்டு, அனுகூலங்களை பெற்றுக் கொள்ளக்கூடிய சூழல் காணப்படுவதால முகவர்கள் குறிப்பிட்டிருந்தனர். கடந்த வாரம் யூனியன் வங்கி பங்குகள் உரிமையாண்மை மாற்றமடைந்திருந்ததை அவதானிக்க முடிந்தது. தொடர்ந்தும், DFCC வங்கி பங்குகளின் மீது அதிகளவு ஆர்வத்தை முதலீட்டாளர்கள் செலுத்தியிருந்தனர். வெள்ளிக்கிழமை நடவடிக்கைகள் நிறைவடைந்த போது அனைத்து பங்கு விலைச் சுட்டெண் 7,406.60 ஆகவும், S&P ஸ்ரீலங்கா 20 சுட்டி 4160.31 ஆகவும் பதிவாகியிருந்தன.

 

செப்டெம்பா் 29ஆம் திகதியுடன் ஆரம்பமான கடந்த வாரத்தின் இறுதியில் மொத்த பங்கு புரள்வு பெறுமதியாக ரூ. 17,250,179,396 அமைந்திருந்தது. கடந்த வாரம் மொத்தமாக 68,359 பங்கு கொடுக்கல் - வாங்கல்கள் இடம்பெற்றன. இதில் உள்நாட்டு கொடுக்கல் வாங்கல்கள் 65,137 ஆகவும் வெளிநாட்டு கொடுக்கல் வாங்கல்கள் 3,222 ஆகவும் பதிவாகியிருந்தன. 

 

திங்கட்கிழமை

வாரம் நேர் பெறுமதிகளுடன் ஆரம்பமாகியிருந்தது. புரள்வு பெறுமதி 3.4 பில்லியன் ரூபாவை கடந்திருந்தது. உயர் நிகர பெறுமதி வாய்ந்த மற்றும் நிறுவனசார் ஈடுபாடு ஜோன் கீல்ஸ் ஹோல்டிங்ஸ் பங்குகளின் மீது பதிவாகியிருந்தது. புரள்வு பெறுமதியில் 52 வீதத்தை இது பங்களிப்பு செய்திருந்தது. சிறியளவிலான முதலீட்டாளர்களின் ஈடுபாடு ஜனசக்தி இன்சூரன்ஸ் பங்குகளின் மீது பதிவாகியிருந்ததுடன், கலப்பு ஈடுபாடு டெக்ஸ்ச்சர்ட் ஜேர்சி லங்கா பங்குகளின் மீது பதிவாகியிருந்தது. வெளிநாட்டவர்கள் அதிகளவு பங்கு விற்பனையில் ஈடுபட்டனர்.

 

செவ்வாய்க்கிழமை

ஜோன் கீல்ஸ் ஹோல்டிங்ஸ், டயலொக் ஆக்சியாடா மற்றும் ஹற்றன் நஷனல் வங்கி ஆகிய பங்குகளின் மீது விலை உயர்வுகள் பதிவாகியிருந்ததன் காரணமாக சுட்டிகள் நேர் பெறுமதியுடன் நிறைவடைந்திருந்தன. புரள்வு பெறுமதி 4.2 பில்லியன் ரூபாவை கடந்திருந்தது. உயர் நிகர பெறுமதி வாய்ந்த நிறுவனசார் ஈடுபாடு ஜோன் கீல்ஸ் ஹோல்டிங்ஸ், செவ்ரொன் லுப்ரிகன்ட்ஸ், கொமர்ஷல் வங்கி, ஹற்றன் நஷனல் வங்கி மற்றும் ஓவர்சீஸ் ரியல்டி ஆகியவற்றின் மீது பதிவாகியிருந்தன. மொத்த புரள்வு பெறுமதியில் 51 வீத பங்களிப்பை இவை வழங்கியிருந்தன. சிறியளவிலான முதலீட்டாளர்களின் ஈடுபாடு ப்ளு டயமன்ட்ஸ், எஸ்எம்பி லீசிங் மற்றும் பான் ஏசியன் பவர் ஆகியவற்றின் மீது பதிவாகியிருந்தன. கலப்பு ஈடுபாடு என்பது டுனாமிஸ் கெப்பிட்டல் மற்றும் ஃபர்ஸ்ட் கெப்பிட்டல் ஹோல்டிங்ஸ் ஆகியவற்றின் மீது பதிவாகியிருந்தன. மேலும், வெளிநாட்டவர்கள் அதிகளவு பங்கு விற்பனையில் ஈடுபட்டிருந்தனர். ஜோன் கீல்ஸ் ஹோல்டிங்ஸ் மற்றும் அக்சஸ் என்ஜினியரிங் பங்குகளை அதிகளவு விற்பனை செய்திருந்தனர்.

 

புதன்கிழமை

டயலொக் ஆக்சியாடா, ஜோன் கீல்ஸ் ஹோல்டிங்ஸ் மற்றும் கொமர்ஷல் வங்கி ஆகியவற்றின் மீது பதிவாகிய விலை அதிகரிப்புகளின் காரணமாக சுட்டிகள் நேர் பெறுமதியில் நிறைவடைந்திருந்ததுடன், புரள்வு பெறுமதி 2.6 பில்லியன் ரூபாவை கடந்திருந்தது. உயர் நிகர பெறுமதி வாய்ந்த நிறுவனசார் ஈடுபாடு என்பது ஆர்பிகோ ஃபினான்ஸ், கொமர்ஷல் வங்கி (வாக்குரிமை மற்றும் வாக்குரிமையற்ற), அக்சஸ் என்ஜினியரிங், ஹற்றன் நஷனல் வங்கி (வாக்குரிமை மற்றும் வாக்குரிமையற்ற) மற்றும் டயலொக் ஆக்சியாடா ஆகியவற்றின் மீது பதிவாகியிருந்தது. சிறியளவிலான முதலீட்டாளர்களின் ஈடுபாடு லங்கா சென்ச்சரி இன்வெஸ்ட்மன்ட்ஸ், பிரவுண்ஸ் இன்வெஸ்ட்மன்ட்ஸ் மற்றும் பான் ஏசியன் பவர் பங்குகளின் மீது பதிவாகியிருந்தது. கலப்பு ஈடுபாடு சிங்கர் ஃபினான்ஸ் பங்குகளின் மீது பதிவாகியிருந்தது. மேலும், வெளிநாட்டவர்கள் அக்சஸ் என்ஜினியரிங் பங்குகளை கொள்வனவு செய்திருந்தனர்.

 

வியாழக்கிழமை

ஜோன் கீல்ஸ் ஹோல்டிங்ஸ், DFCC வங்கி மற்றும் கொமர்ஷல் லீசிங் அன்ட் ஃபினான்ஸ் ஆகியவற்றின் மீது உயர் பெறுமதிகள் பதிவாகியிருந்தமை காரணமாக சுட்டிகள் நேர் பெறுமதிகளை பதிவு செய்திருந்தது. புரள்வு பெறுமதி 2.4 பில்லியன் ரூபாவை கடந்திருந்தது. உயர் நிகர பெறுமதி வாய்ந்த மற்றும் நிறுவனசார் ஈடுபாடு என்பது ஆர்பிகோ ஃபினான்ஸ், ஹற்றன் நஷனல் வங்கி (வாக்குரிமை மற்றும் வாக்குரிமையற்ற பங்குகள்) மற்றும் பீபிள்ஸ் லீசிங் அன்ட் ஃபினான்ஸ் ஆகியவற்றின் மீது பதிவாகியிருந்தது. சிறியளவிலான முதலீட்டாளர்களின் ஈடுபாடு சிட்டிசன்ஸ் டிவலப்மன்ட் பிஸ்னஸ் ஃபினான்ஸ் மற்றும் பிரவுண்ஸ் இன்வெஸ்ட்மன்ட்ஸ் ஆகியவற்றின் மீது பதிவாகியிருந்தது. அக்சஸ் என்ஜினியரிங் பங்குகள் மீது கலப்பு ஈடுபாடு பதிவாகியிருந்தது. வெளிநாட்டவர்கள் ஜோன் கீல்ஸ் ஹோல்டிங்ஸ் மற்றும் அக்சஸ் என்ஜினியரிங் பங்குகள் மீது கொள்வனவு ஈடுபாட்டை வெளிப்படுத்தியிருந்தனர்.

 

வெள்ளிக்கிழமை

கொமர்ஷல் வங்கி, DFCC வங்கி மற்றும் டயலொக் ஆக்சியாடா ஆகியவற்றின் மீது உயர் விலைப் பெறுமதிகள் பதிவாகியிருந்ததன் காரணமாக, சுட்டிகள் நேர் பெறுமதியை பதிவு செய்து நிறைவடைந்திருந்தன. சந்தை புரள்வு பெறுமதி 4.3 பில்லியன் ரூபாவை கடந்திருந்தது. உயர் நிகர பெறுமதி வாய்ந்த நிறுவனசார் ஈடுபாடு பான் ஏசியா வங்கி, ஜோன் கீல்ஸ் ஹோல்டிற்ஸ், ஹேலீஸ், டயலொக் ஆக்சியாடா, சிலோன் டொபாக்கோ கம்பனி மற்றும் ஆசிரி ஹொஸ்பிட்டல் ஹோல்டிங்ஸ் ஆகியவற்றின் மீது பதிவாகியிருந்தது. இவை புரள்வு பெறுமதியில் 46 வீதமாக பதிவாகியிருந்தது. லங்கா சென்ச்சரி இன்வெஸ்ட்மன்ட்ஸ் மீது சிறியளவிலான முதலீட்டாளர்களின் ஈடுபாடு காணப்பட்டது. கலப்பு ஈடுபாடு என்பது ஹற்றன் நஷனல் வங்கி மற்றும் டோக்கியோ சீமெந்து ஆகியவற்றின் மீது பதிவாகியிருந்தது.  

 

கடந்த வார கொடுக்கல் வாங்கல் நடவடிக்கைகளில் பான் ஏஷியா, ஈக்குவிட்டி டூ பிஎல்சி, டுனாமிஸ் கெப்பிட்டல், DFCC வங்கி மற்றும் டீ ஸ்மோல் ஹோல்டர்போன்றன முதல் ஐந்து சிறந்த இலாபமீட்டிய பட்டியலிடப்பட்ட கம்பனிகளாக பதிவாகியிருந்தன. 

 

லங்கா சென்ச்சரி (உரிமை), பரகன், கொமர்ஷல் டிவ, குட் ஹோப் மற்றும் லேக் ஹவுஸ் பிரின். போன்ற நிறுவனங்களின் பங்குகள் அதிகளவு நஷ்டமீட்டியதாக பதிவாகியிருந்தன.

தங்கம் விலை நிலைவரம்

கடந்த வாரம் 24 கெரட் தங்கத்தின் சராசரி விலை 44,300 ரூபாவாகவும், 22 கெரட் தங்கத்தின் விலை 41,600 ரூபாவாகவும் அமைந்திருந்ததாக தங்க நகை வியாபார வட்டாரங்களிலிருந்து அறிந்து கொள்ள முடிந்தது. 

 

நாணய மாற்று விகிதம்

கடந்த வாரம் டொலருக்கு நிகரான ரூபாவின் சராசரி விற்பனை பெறுமதி 131.82 ஆக பதிவாகியிருந்தது. ஐக்கிய இராச்சிய பவுணுக்கு நிகரான சராசரி விற்பனை பெறுமதி 213.26 ஆக காணப்பட்டிருந்தது.