பங்குச்சந்தை, தங்கம் விலை மற்றும் நாணயமாற்று வீத நிலைவரங்கள்

 

கொழும்பு பங்குச்சந்தை முன்னைய வாரத்தை விட உயர்வான பெறுமதிகளை பதிவு செய்திருந்ததை அவதானிக்க முடிந்திருந்தது. நடப்பு நிதியாண்டின் இரண்டாம் காலாண்டுக்கான கணக்கறிக்கைகள் வெளியாகிய வண்ணமுள்ளமை, குறிந்த நிறுவனங்களின் மீதூன பங்குகளில் உயர்ந்த ஈடுபாட்டை பதிவு செய்ய ஏதுவாக அமைந்திருந்தது. மேலும், வஙகி வட்டி வீதங்கள் குறைந்தளவில் காணப்படுகின்றமையும் பங்குச்சந்தை கொடுக்கல் வாங்கல்களில் நாட்டம் அதிகளவில் காணப்படுவதற்கு ஏதுவாக அமைந்திருந்தது. வெள்ளிக்கிழமை நடவடிக்கைகள் நிறைவடைந்த போது அனைத்து பங்கு விலைச் சுட்டெண் 7,326.81 ஆகவும், S&P ஸ்ரீலங்கா 20 சுட்டி 4087.38 ஆகவும் பதிவாகியிருந்தன.

 

ஒக்டோபர் 27ஆம் திகதியுடன் ஆரம்பமான கடந்த வாரத்தின் இறுதியில் மொத்த பங்கு புரள்வு பெறுமதியாக ரூ. 10,863,470,085 அமைந்திருந்தது. கடந்த வாரம் மொத்தமாக 44,427 பங்கு கொடுக்கல் வாங்கல்கள் இடம்பெற்றன. இதில் உள்நாட்டு கொடுக்கல் வாங்கல்கள் 42,502 ஆகவும் வெளிநாட்டு கொடுக்கல் வாங்கல்கள் 1,925 ஆகவும் பதிவாகியிருந்தன. 

 

ஜோன் கீல்ஸ் ஹோல்டிங்ஸ், டயலொக் ஆக்சியாடா மற்றும் சிலோன் கோல்ட் ஸ்ரோர்ஸ் ஆகியவற்றின் நேர் பெறுமதி பங்களிப்புடன் சுட்டிகள் உயர் பெறுமதிகளுடன் நிறைவடைந்திருந்தன. உயர் நிகர பெறுமதி வாய்ந்த நிறுவனசார் ஈடுபாடுகள் நெஸ்லே லங்கா, செலான் வங்கி வாக்குரிமையற்ற பங்குகள் மற்றும் ஓவர்சீஸ் ரியல்ட்டி பங்குகளின் மீது பதிவாகியிருந்தன. வட்டவளை பிளான்டேஷன்ஸ் பங்குகளின் மீது சிறியளவிலான முதலீட்டாளர்களின் ஈடுபாடு பதிவாகியிருந்தது. சன்சைன் ஹோல்டிங்ஸ், லங்கா ஐஓசி, வலிபல் பவர் எரத்னா மற்றும் சிலோன் கோல்ட் ஸ்ரோர்ஸ் ஆகியவற்றின் மீது கலப்பு ஈடுபாடு பதிவாகியிருந்தது. வெளிநாட்டவர்கள் பெருமளவு நிகர விற்பனையாளர்களாக பதிவாகியிருந்தனர்.

 

அபவிசு நேர் பெறுமதியுடனும், S&P SL20 மறை பெறுமதியுடனும் நிறைவடைந்திருந்தன. புரள்வு பெறுமதி 1.6 பில்லியன் ரூபாவை கடந்திருந்தது. உயர் நிகர பெறுமதி வாய்ந்த மற்றும் நிறுவனசார் ஈடுபாடு என்பது அக்சஸ் என்ஜினியரிங், ஜோன் கீல்ஸ் ஹோல்டிங்ஸ், செவ்ரொன் லுப்ரிகன்ட்ஸ், ஓவர்சீஸ் ரியல்டி மற்றும் செலான் வங்கி வாக்குரிமையற்ற பங்குகளின் மீது பதிவாகியிருந்தது. சிறியளவிலான முதலீட்டாளர்களின் ஈடுபாடு எஸ்எம்பி லீசிங் மற்றும் வலிபல் பவர் எரத்னா ஆகிய பங்குகளின் மீது பதிவாகியிருந்தது. கலப்பு ஈடுபாடு என்பது வட்டவளை பிளான்டேஷன் பங்குகளின் மீது பதிவாகியிருந்தது. வெளிநாட்டவர்கள் பங்கு கொள்வனவில் ஆர்வம் செலுத்தியிருந்தனர். புரள்வு பெறுமதியில் 70 வீத பங்களிப்பை இவர்கள் வழங்கியிருந்தனர்.

 

லங்கா ஐஓசி, லங்கா ஒரிக்ஸ் லீசிங் மற்றும் ஹற்றன் நஷனல் வங்கி ஆகியவற்றின் பங்களிப்புடன் சுட்டி நேர் பெறுமதியுடன் நிறைவடைந்திருந்தது. புரள்வு பெறுமதி 2.2 பில்லியன் ரூபாவை கடந்திருந்தது. உயர் நிகர பெறுமதி வாய்ந்த மற்றும் நிறுவனசார் ஈடுபாடுகள் சிலோன் ஹொஸ்பிட்டல்ஸ், கொமர்ஷல் வங்கி, டயலொக் ஆக்சியாடா, ஜோன் கீல்ஸ் ஹோல்டிங்ஸ், ஓவர்சீஸ் ரியல்டி மற்றும் பீபிள்ஸ் லீசிங் அன்ட் ஃபினான்ஸ் ஆகியவற்றின் மீது பதிவாகியிருந்தது. மல்வத்த பிளான்டேஷன்ஸ், அக்மி பிரின்டிங் அன்ட் பக்கேஜிங் மற்றும் லங்கா சென்ச்சரி இன்வெஸ்ட்மன்ட்ஸ் ஆகியவற்றின் மீது சிறியளவிலான முதலீட்டாளர்களின் ஈடுபாடு பதிவாகியிருந்தது. மேலும், கலப்பு ஈடுபாடு என்பது லங்கா ஐஓசி, பிரமல் கிளாஸ் மற்றும் வலிபல் பவர் எராத்ன ஆகியவற்றின் மீது பதிவாகியிருந்தது. வெளிநாட்டவர்கள் பங்கு கொள்வனவில் நாட்டம் காண்பித்திருந்தனர்.

 

ஜோன் கீல்ஸ் ஹோல்டிங்ஸ், கொமர்ஷல் வங்கி மற்றும் செலிங்கோ இன்சூரன்ஸ் ஆகியவற்றின் மீது விலை உயர்வு காரணமாக சுட்டிகள் நேர் பெறுமதியை பதிவு செய்து நிறைவடைந்திருந்தன. புரள்வு பெறுமதி 2.2 பில்லியன் ரூபாவாக பதிவாகியிருந்தது. உயர் நிகர பெறுமதி வாய்ந்த நிறுவனசார் ஈடுபாடு பீபிள்ஸ் லீசிங் அன்ட் ஃபினான்ஸ், டயலொக் ஆக்சியாடா, ஜோன் கீல்ஸ் ஹோல்டிங்ஸ், ஹேமாஸ் ஹோல்டிங்ஸ், ஓவர்சீஸ் ரியல்டி மற்றும் ஹற்றன் நஷனல் வங்கி ஆகியவற்றின் மீது பதிவாகியிருந்தது. சொஃப்ட்லொஜிக் கெப்பிட்டல், பிரவுண்ஸ் இன்வெஸ்ட்மன்ட்ஸ் மற்றும் பான் ஏசியன் பவர் ஆகியவற்றின் மீது சிறியளவிலான முதலீட்டாளர்களின் ஈடுபாடு பதிவாகியிருந்தது. மேலும், பீபிள்ஸ் லீசிங் அன்ட் ஃபினான்ஸ் மற்றும் வலிபல் பவர் எரத்னா ஆகியவற்றின் மீது கலப்பு ஈடுபாடு காணப்பட்டது. வெளிநாட்டவர்கள் ஜோன் கீல்ஸ் பங்குகளை கொள்வனவு செய்வதில் பெருமளவு ஈடுபாட்டை காண்பித்திருந்தனர்.

 

சுட்டிகள் நேர் பெறுமதிகளை பதிவு செய்து நிறைவடைந்திருந்தன. இதில் கொமர்ஷல் வங்கி, ஜோன் கீல்ஸ் ஹோல்டிங்ஸ் மற்றும் DFCC வங்கி போன்றன பங்களிப்பை வழங்கியிருந்தன. புரள்வு பெறுமதி 3.8 பில்லியன் ரூபாவை கடந்;திருந்தது. உயர் நிகர பெறுமதி வாய்ந்த நிறுவனசார் ஈடுபாடு என்பது பீபிள்ஸ் லீசிங் அன்ட் ஃபினான்ஸ், நேஷன்ஸ் ட்ரஸ்ட் வங்கி, தேசிய அபிவிருத்தி வங்கி, ஜோன் கில்ஸ் ஹோல்டிங்ஸ் மற்றும் டயலொக் ஆக்சியாடா ஆகியவற்றின் மீது பதிவாகியிருந்தது. சிறியளவிலான முதலீட்டாளர்களின் ஈடுபாடு என்பது ஓவர்சீஸ் ரியல்டி மற்றும் டோக்கியோ சீமெந்து ஆகியவற்றின் மீது பதிவாகியிருந்தது. வெளிநாட்டவர்கள் அதிகளவு பங்கு கொள்வனவில் ஆர்வம் செலுத்தியிருந்தனர். நேஷன்ஸ் ட்ரஸ்ட் வங்கி பங்குகளின் மீது வெளிநாட்டவர்கள் அதிகளவு ஈடுபாட்டை காண்பித்திருந்தனர்.

 

கடந்த வார கொடுக்கல் வாங்கல் நடவடிக்கைகளில் செரன்டிப் என்ஜி. குரூப், மொரிசன்ஸ், போகல கிரஃபைட், மொரிசன்ஸ் (சாதாரண) மற்றும் வலிபெல் போன்றன முதல் ஐந்து சிறந்த இலாபமீட்டிய பட்டியலிடப்பட்ட கம்பனிகளாக பதிவாகியிருந்தன. 

 

லங்கா சென்ச்சரி (உரிமை), பரகன், எஸ் எம் பி லீசிங் (சாதாரண), ஹபுகஸ்தென்ன மற்றும் ஃபின்லேஸ் கொலம்போ போன்ற நிறுவனங்களின் பங்குகள் அதிகளவு நஷ்டமீட்டியதாக பதிவாகியிருந்தன.

 

கடந்த வாரம் 24 கெரட் தங்கத்தின் சராசரி விலை 44,000 ரூபாவாகவும், 22 கெரட் தங்கத்தின் விலை 41,400 ரூபாவாகவும் அமைந்திருந்ததாக தங்க நகை வியாபார வட்டாரங்களிலிருந்து அறிந்து கொள்ள முடிந்தது. 

 

கடந்த வாரம் டொலருக்கு நிகரான ரூபாவின் சராசரி விற்பனை பெறுமதி 132.38 ஆக பதிவாகியிருந்தது. ஐக்கிய இராச்சிய பவுணுக்கு நிகரான சராசரி விற்பனை பெறுமதி 212.69 ஆக காணப்பட்டிருந்தது.