வவுனியா நகரசபைத் தலைவர் தெரிவு; இலங்கை தமிழரசுக் கட்சி முக்கியஸ்தர் ஒன்றுகூட ஏற்பாடு

(ரி.விவேகராசா)

வவுனியா நகரசபைத் தலைவரை தெரிவுசெய்வதற்காக இலங்கை தமிழரசுக் கட்சியின் முக்கியஸ்த்தர்கள் எதிர்வரும் திங்கட்கிழமை வவுனியாவில் கூடவுள்ளனர்.

நாடாளுமன்ற உறுப்பினரும் கட்சியின் செயலாளருமான மாவை சேனாதிராசா தலைமையில் நடைபெறவுள்ள இந்தக் கூட்டத்தில்  வன்னி மாவட்ட தமிழரசுக் கட்சி நாடாளுமன்ற உறுப்பினர்களும் வவுனியா நகரசபையின் தமிழரசுக் கட்சி உறுப்பினர்களும் கலந்துகொள்ளவுள்ளதாக தெரிவிக்கப்படுகிறது.

வவுனியா நகரசபைத் தலைவராக கடந்த 15 மாதகாலமாக பதவி வகித்த எஸ்.என்.ஜி.நாதன் கடந்த 10ஆம் திகதி தனது பதவியை  இராஜினாமாச் செய்ததையடுத்து, வெற்றிடமாகவுள்ள பதவிக்கு கட்சியின் தீர்மானத்திற்கமையவே புதிய தலைவர் நியமிக்கப்படவுள்ளார்.

நகரசபைத் தேர்தலில் கூடிய விருப்பு வாக்குகளைப் பெற்றவரை தலைவராக நியமிக்க கட்சி தலைமைப்பீடம் முயற்சி எடுக்கவுள்ள அதேவேளை,   எதிர்ப்புக்களும் ஏற்பட்டுள்ளன. வவுனியா நகரத்திற்கு முதன்மையானவர் நகரபிதா. இதற்கு தகுதி, ஆற்றல், ஆளுமை கொண்டவர் ஒருவரே நியமிக்கப்பட வேண்டுமென்பதே பலரும் விடுத்துள்ள கோரிக்கையாகும்.