இணைய வழிவாயிலாக பரீட்சைகளை நடத்த ஏற்பாடு

-எஸ்.நிதர்ஷன்

யாழ். பல்கலைக்கழக கலைப்பீடத்தின் இராமநாதன் நுண்கலைக் கல்லூரியில், நுண்கலைமாணி (பரதம்), நுண்கலைமாணி (சங்கீதம்), நுண்கலைமாணி (சித்திரமும் வடிவமைப்பும்) ஆகிய நான்கு வருடக் கற்கை நெறிகளின் 2020/2021ஆம் கல்வியாண்டுக்காக விண்ணப்பித்த மாணவர்களுக்கான அனுமதி / தெரிவுப் பரீட்சைகள், இணைய வழியாக நடைபெறவுள்ளன.

நாட்டின் தற்போதைய சூழ்நிலைக்கேற்ப அனுமதி / தெரிவுப் பரீட்சைகளை மாற்று ஏற்பாட்டின் படி, இணைய வழியாக நடத்துவதற்கு, பல்கலைக்கழகங்களின் துணைவேந்தர்களுடனான கூட்டத்தின் பின்னர் பல்கலைக்கழக மானியங்கள் ஆணைக்குழு தீர்மானித்துள்ளது.

அந்தத் தீர்மானத்துக்கு அமைய, யாழ். பல்கலைக்கழகத்தால்  நுண்கலைமாணி (பரதம்) கற்கை நெறிக்கான  இணைய வழி அனுமதி / தெரிவுப் பரீட்சைகள் ஜுன் 14ஆம் திகதியும்,  நுண்கலைமாணி (சங்கீதம்) கற்கை நெறிக்கான  இணைய வழி அனுமதி / தெரிவுப் பரீட்சைகள் ஜுன் 15ஆம் திகதி;, நுண்கலைமாணி (சித்திரமும் வடிவமைப்பும்) கற்கை நெறிக்கான  இணைய வழி அனுமதி / தெரிவுப் பரீட்சைகள் ஜுன்; 21ஆம் திகதியும் நடைபெறும்.

பரீட்சை நேர ஒழுங்குகள் மற்றும் பரீட்சைக்கான இணைய நிகழ்நிலை இணைப்பு பற்றிய விவரங்கள், யாழ். பல்கலைக்கழக அனுமதிகள் கிளையால் பதிவு செய்த மாணவர்களின் மின்னஞ்சல் முகவரிகளுக்கு அனுப்பி வைக்கப்படும் என அறிவிக்கப்பட்டுள்ளது.