வடிகான்களுக்கான துப்பரவு பணிகள் ஆரம்பம்

நடராசா கிருஸ்ணகுமார்

யாழ்ப்பாணம் மாநகர சபை எல்லைக்குட்பட்ட பகுதிகளில் வடிகான்கள் துப்பரவு செய்யப்பட்டு வருகின்றன. போர்ச்சூழல் காரணமாக, 1994ஆம் ஆண்டிற்குப் பின்னர் யாழ்ப்பாணம் புகையிரத நிலையத்திலிருந்து யாழ் போதனா மருத்துவமனைக்கு அருகிலான சிக்னல் சந்தி, மருத்துவமனை வீதியூடாக கடல் வரையான பகுதிகள் துப்பரவு செய்யப்பட்டு வருகின்றன.

கடற்கரை பகுதியிலும் நீர் வழிந்தோடுவதற்கான இடங்கள் சுத்தமாக்கப்பட்டு வருகின்றன. யாழ் மாநகர சபை ஆணையாளர், யாழ் மாநகர சபையின் வேலைப்பகுதிக்கான பொறியியலாளரின் நேரடி வழிகாட்டலில்  மேற்பார்வையாளர் பி.ஜெயராஜின்  மேற்பார்வையில் புதிதாக மாநகர சபை வேலையில் இணைத்துக் கொள்ளப்பட்ட முப்பது தொழிலாளர்களினால், இவ்வேலைகள் நடைபெறுகின்றன.

அத்துடன் ஏற்கனவே குருநகரின் சென்றோட் வடிகால், அண்ணாசிலையடி வடிகால், றூபிளான் வடிகால், றெக்கிலேன் வடிகால், பழைய நீர்த்தாங்கி வடிகால் என்பன துப்பரவு செய்யப்பட்டுள்ளன.  மேலும் நொத்தாரிஸ் லேனில் இருந்து கண்டி வீதி, இலந்தைக்குளம், கொழும்புத்துறை ஊடாக கடலில் கலக்கின்ற வரையான வடிகால்கள் துப்பரவு செய்யப்பட்டுள்ளன. மழை காலத்தினை கருத்திற்கொண்டு வடிகால்களை துப்பரவு செய்யும் வேலைத்திட்டம் யாழ் மாநகர சபையினால் முன்னெடுக்கப்பட்டு வருகின்றது.