வசூலில் சாதனை படைக்கும் பிரேமலு

மலையாள திரையுலகின் முன்னணி இயக்குநர்களில் ஒருவரான கிரிஷ் ஏ.டி இயக்கத்தில் வெளியான மலையாள திரைப்படமான பிரேமலு, வசூலில் சாதனைப் படைத்து வருகின்றது. ஏற்கனவே, 'தண்ணீர் மாத்தன் தினங்கள்" மற்றும் 'சூப்பர் சரண்யா" போன்ற வெற்றிப் படங்களை இயக்கி புகழ்பெற்ற இயக்குநர் கிரிஷ் ஏ.டி., 'பிரேமலு" திரைப்படத்தின் மூலம் மீண்டும் ரசிகர்களை கவர்ந்திருக்கிறார்.

இதில் மலையாள சினிமாவின் முன்னணி நடிகர்களான நஸ்லென் கே.கஃபூர் மற்றும் மமிதா பைஜு ஆகியோர் முக்கிய கதாபாத்திரங்களில் நடித்துள்ளனர். படத்தில் எளிமையான அதேசமயம் வசீகரிக்கும் கதைக்களமும், நகைச்சுவையுடன் சேர்ந்த நல்ல காதல் கதையும் இருப்பது வெற்றிக்கு காரணமாக அமைந்துள்ளதாக ரசிகர்கள் கொண்டாடி மகிழ்கின்றனர்.

நஸ்லென் கஃபூர் மற்றும் மமிதா பைஜு ஆகியோருக்கு இடையில் நடக்கும் அழகான காதல் ரசிகர்களுக்கு புதுவித சினிமா அனுபவத்தையும், அதே சமயம் பல இடங்களில் சிரிப்பையும் வர வைப்பதாக படம் பார்த்தவர்கள் தெரிவிக்கின்றனர்.

பிரேமலு மலையாள சினிமாவில் வெளியாகி உள்ள மற்றொரு சிறந்த திரைப்படமாக அமைந்துள்ளமை பாராட்டுக்குறியது.