புதிய சிக்கலில் சிம்பு...

நடிகரும், இயக்குனருமான டி.ராஜேந்தர் மற்றும் அவரது மகன் நடிகர் சிலம்பரசன் மீது திரைப்பட விநியோகஸ்தரான எஸ்.பி.ராமமூர்த்தி சென்னை மாநகர பொலிஸில் கொலை மிரட்டல் முறைப்பாடு செய்துள்ளார். அந்த புகார் மனுவில் தெரிவிக்கப்பட்டுள்ளதாவது,

1999ஆம் ஆண்டு 'மோனிசா என் மோனாலிசா' திரைப்படத்துக்கான 'குறைந்த பட்ச உறுதி' அடிப்படையில், டி.ராஜேந்தர் எனக்கு ரூ.31 இலட்சம் தரவேண்டியுள்ளது. நான் அந்தப் பணத்தைக் கேட்டபோது டி.ராஜேந்தர் அதனைத் தர மறுத்தார். இது தொடர்பாக கடந்த 2007ஆம் ஆண்டில் உயர்நீதிமன்றத்தில் வழக்கு தொடரப்பட்டது. இந்நிலையில் சிம்பு நடித்த 'சிலம்பாட்டம்' திரைப்படம், சிம்பு சினி ஆர்ட்ஸ் பெயரில் வெளியிட முயற்சி செய்யப்பட்டது.

கடன் பாக்கிக்காக அந்த படத்திற்கு, உயர்நீதிமன்றத்தில் இடைக்காலத் தடை உத்தரவு பெற முயற்சித்தேன். அப்போது ராஜேந்தர் பணத்தை தர ஒப்புக்கொண்டதால், அம்முயற்சியை கைவிட்டேன். அதன்பின், சிம்பு நடித்த திரைப்படங்களான 'விண்ணைத் தாண்டி வருவாயா' மற்றும் 'வானம்' ஆகியவற்றை சிம்பு சினி ஆர்ட்ஸ் பெயரில் வெளியிடாமல் மற்ற பேனரில் வெளியிட்டனர். 'வானம்' படம் வெளியான போது ராஜேந்தரை அவரது வீட்டுக்கு சென்று பார்த்தேன்.

அப்போது அவரும் அவரது மகன் சிலம்பரசனும் என்னை மிரட்டி, விரட்டி அடித்தனர். மேலும், 'ஆட்சியே எனக்கு சாதகமாக உள்ளது. ஊடகமும் என் கையில் உள்ளது. உன்னால் ஒன்றும் செய்ய முடியாது, உன்னை கொன்று விடுவேன் ஓடி விடு' என ராஜேந்தர் அச்சுறுத்தினார். தற்போது ஆட்சி மாற்றம் ஏற்பட்டுள்ளதாலும், ஏற்கனவே தொடர்ந்த வழக்கு நிலுவையில் உள்ளதாலும், கடந்த 3ஆம் திகதி ராஜேந்தர் என்னை சமரசம் பேச, அவரது வீட்டுக்கு அழைத்ததன் பேரில் அவரை சந்திக்கச் சென்றேன்.

அப்போது அவரது மகன் சிலம்பரசன், என்னை கொன்று விடுவதாக மிரட்டி, விரட்டினார். மேலும், 'வழக்கு தானே போட்டீங்க, அங்கேயே போய் பணத்தை வாங்கிக் கொள்ளுங்கள்' என்றும்; கூறினார். 'எந்த ஆட்சி வந்தாலும் உன்னால் ஒன்றும் செய்ய முடியாது' என்று கூறி எனது கன்னத்தில் அறைந்து வெளியே தள்ளினார். இவர்களால் என் உயிருக்கு ஆபத்து ஏற்பட்டுள்ளது. எனவே பணத்தை மீட்டுத் தருவதுடன், எனக்கு பாதுகாப்பும் அளிக்க வேண்டும' என்று அவர் அந்த அதில் தெரிவித்துள்ளார்.