மூக்கும் மூக்கும் முட்டாது முத்தமிட்ட விஜய்

சங்கர் இயக்கத்தில் பொங்கல் வெளியீடாக 'நண்பன்' மிக வேகமாகப் ஓடிக்கொண்டிருப்பதானது திரைப்படக் குழுவினரை மகிழ்ச்சியின் உச்சத்திற்குக் கொண்டுசென்றுள்ளது.

இவ்வாறான திரைப்படங்களில் விஜய் தொடர்ந்து நடித்தால் எப்படியிருக்கும் என்று ரசிகர்கள் ஆர்வத்தோடு கூறுவதையும் கேட்கக்கூடியதாக இருக்கின்றது.

ஆண்கள், பெண்கள், குழந்தைகள், பெரியவர்கள் என அனைத்துத் தரப்பினரும் நண்பனைப் பார்க்க அலை மோதுவதை திரையரங்குகளில் காண முடிகிறது.

நண்பன் படம் வசூலில் அள்ளிக் கொண்டிருப்பதை தமிழ்த் திரையுலகமும் கூட சந்தோஷத்துடன் பார்த்துக் கொண்டிருக்கிறது.

இந்த நிலையில் செய்தியாளர்களைச் சந்தித்து கருத்து தெரிவித்துள்ளார் நடிகர் விஜய். இதன்போது அவர் தெரிவித்துள்ளதாவது,

'நண்பன் திரைப்படம் நன்றாக ஓடிக்கொண்டிருக்கிறது. ஏற்கனவே நான் நடித்து வெளியான திரைப்படங்களை விடவுட் வசூல் சாதனை படைத்துள்ளதாக தகவல்கள் வெளியாகியுள்ளன. வித்தியாசமான கதாபாத்திரங்களில் நடிக்க ஆர்வம் இருந்தது. இந்தியில் 3 இடியட்ஸ் பார்த்த போது மிகவும் பிடித்தது.

அதனால் அதன் ரீமேக்கில் நடித்தேன். இவ்வாறாக கதாபாத்திரங்களில் நடிக்க கதை, இயக்குனர், தயாரிப்பாளர் எல்லோரும் எதிர்பார்த்த மாதிரி அமைய வேண்டும். நண்பன் படத்தில் அது அமைந்தது. இதில் அக்ஷன், பன்ச் வசனம் இல்லை. பத்து பேரை அடித்து சண்டை போடுவது ஒரு வகை ஹீரோயிசமாக இருந்தாலும் நண்பன் பட கதாபாத்திரம் வேறு விதமான ஹீரோயிசம்.

என்னை திரையில் வித்தியாசமாக பார்க்க ஆசைப்பட்டேன். அது நண்பன் படத்தில் நிறைவேறியது. என் படங்களில் பஞ்ச் வசனங்களை திணிக்க விரும்ப மாட்டேன். சீன்களுக்கு தேவைப்பட்டால் மட்டுமே பேசுவேன்.

நண்பன் படத்தில் கதைக்கு தேவையாக இருந்ததால் இலியானாவுடன் முத்த காட்சியில் நடித்தேன். அதேசமயம், நேருக்கு நேராக முத்தம் கொடுக்கவில்லை. மாறாக சாய்த்துக் கொடுத்ததால், மூக்குடன் மூக்கு இடிக்கவில்லை. ஸ்ரீகாந்த், ஜீவா பேன்ட் கழற்றும் சீன்கள் தவறாக தெரியவில்லை. கல்லூரி பகிடிவதைகளில் அவை நடப்பவை தான். படப்பிடிப்பில் ஸ்ரீகாந்த்தும் ஜீவாவும் எனக்கு நெருக்கமான நண்பர்களாகி விட்டனர்.

தற்கால கல்வி முறையின் தவறுகள் படத்தில் சுட்டிக்காட்டிப்பட்டுள்ளன. மாணவர்களுக்கு எந்த துறையில் ஆர்வம் இருக்கிறதோ அதில் அனுப்ப வேண்டும். எனது அப்பா என்னை டாக்டராக்க ஆசைப்பட்டார். எனக்கு நடிப்பில் ஆர்வம் இருந்ததால் சினிமாவுக்கு வந்து விட்டேன். எனது மகனுக்கு கிரிக்கெட்டில் ஆர்வம் இருக்கிறது.

அடுத்து துப்பாக்கி படத்தில் நடிக்கிறேன். இப்படம் வேறு பரிமானத்தில் இருக்கும். நண்பன் படத்துக்கு கேளிக்கை வரி விலக்கு அளித்த முதல்வருக்கு நன்றி தெரிவித்துக்கொள்கிறேன்' என்று கூறியுள்ளார் விஜய்.