முறியாண்டிப் பிரதேசத்தில் புதிய பாலம்

-எம்.சி.அன்சார்

அம்பாறை, சம்மாந்துறைப் பிரதேச செயலகத்துக்கு உட்பட்ட முறியாண்டிப் பிரதேசத்தில் வீரமுனை -அம்பாலாந்துறை வீதியில் புதிய பாலம் ஒன்றை நிர்மாணிப்பதற்கான வேலை செவ்வாய்;க்கிழமை (01) ஆரம்பிக்கப்பட்டுள்ளது.

மேற்படி பிரதேசமானது மழைக்காலத்தில் நீரில் மூழ்குவதால், பொதுமக்களும்; விவசாயிகளும் போக்குவரத்துச் செய்வதில் சிரமத்தை எதிர்கொண்டு வந்தனர். இது தொடர்பில் திகாமடுல்ல நாடாளுமன்;ற உறுப்பினரும் அம்பாறை மாவட்ட அபிவிருத்திக் குழுவின் இணைத் தலைவருமான எம்.ஐ.எம்.மன்சூரின் கவனத்துக்கு பொதுமக்கள் கொண்டுவந்தனர்.

இதனை அடுத்து, அவரின் முயற்சியால் வீதி அபிவிருத்தி அதிகாரசபையின் 08 மில்லியன் ரூபாய் நிதி ஒதுக்கீட்டில்; இப்பாலம் நிர்மாணிக்கப்படவுள்ளது. இதன் நிர்மாண வேலை 06 மாதகாலத்துக்குள் பூர்த்தியாகும் எனவும் தெரிவிக்கப்பட்டுள்ளது.  

இப்பாலத்தை நிர்மாணிப்பதன் மூலம் சம்மாந்துறை, வீரமுனை, வீரச்சோலை, சொறிக்கல்முனை, நாவிதன்வெளி, சவளக்கடை, மத்தியமுகாம் ஆகிய பிரதேசங்களைச் சேர்ந்த  விவசாயிகளும் பொதுமக்களும் நன்மை அடைவர்.