சம்புக்களப்பு வடிச்சல் தோண்டும் நடவடிக்கை கைவிடப்படல்

(ஹனீக் அஹமட்)

அம்பாறை மாவட்டம் சம்புக்களப்புப் பிரதேசத்திலுள்ள 08 ஆயிரத்து 500 ஏக்கர் காணிகள் பயன்பெறும் வகையிலான திட்டமெனக் கூறி கடந்த உள்ளுராட்சி தேர்தல் காலத்தில் ஆரம்பிக்கப்பட்ட வடிச்சல் தோண்டும் நடவடிக்கையானது – கைவிடப்பட்டுள்ளமை குறித்து அப்பகுதி விவசாயிகள் தமது விசனங்களைத் தெரிவிக்கின்றனர்.

மேற்படி வடிச்சல் தோண்டும் நடவடிக்கையானது, மண் அகழும் - மிதக்கும் இயந்திரத்தைப் பயன்படுத்தி மார்ச் 28 ஆம் திகதி கிழக்கு மாகாண முதலமைச்சர் சிவநேசத்துரை சந்திரகாந்தனினால் ஆரம்பித்து வைக்கப்பட்டது.

குறித்த மண் அகழும் - மிதக்கும் இயந்திம் - கிழக்கு மாகாண வீதி அபிவிருத்தி, நீர்ப்பாசனம், வீடமைப்பும் நிர்மாணமும், கிராமிய மின்சாரம் மற்றும் நீர்வழங்கல் அமைச்சின் நிதியொதுக்கீட்டின் கீழ் கொள்வனவு செய்யப்பட்டிருந்தமை குறிப்பிடத்தக்கது.

கடந்த பல ஆண்டுகளாக, சம்புக்களப்பு பகுதியிலுள்ள பல்லாயிரக்கணக்கான நெற் காணிகள் - வடிச்சல் வசதிகள் இல்லாத காரணத்தினால் விவசாயம் மேற்கொள்ளப்படாமல் கைவிடப்பட்டுள்ள நிலையிலேயே இந்த வடிச்சல் அபிவிருத்தி வேலைத் திட்டம் ஆரம்பிக்கப்பட்டது.

சுமார் 100 அடி அகலமும், 08 அடி ஆழமும் கொண்டதாக இந்த வடிச்சல் - கால்வாய் அமையும் என்று கூறப்பட்டது.

ஆயினும், தேர்தல் காலத்தின் போது – மிகவும் வேகமாக இடம்பெற்ற இந்த நடவடிக்கையானது, தேர்தல் முடிந்ததும், திடீரென நிறுத்தப்பட்டமைக்கான காரணம் என்னவென்று அப்பகுதி விவசாயிகள வினவுகின்றனர்.