அம்பாறை, மட்டக்களப்பில் ஆளுநர் அலுவலகங்கள்

கிழக்கு மாகாண ஆளுநரின் உப அலுவலகங்கள், அம்பாறை, மட்டக்களப்பு மாவட்டங்களில் அமைக்கப்படுமென, ஆளுநரின் செயலாளர் அசங்க அபேவர்த்தன தெரிவித்தார்.

இது தொடர்பாக அவர் மேலும் தெரிவிக்கையில்,

"தூரப் பிரதேசங்களான அம்பாறை, மட்டக்களப்பு மாவட்டங்களில் இருந்து, திருகோணமலைக்கு சமுகமளித்து அதிகாரிகளைச் சந்திப்பதில், மக்கள் எதிர்நோக்கும் இடர்பாடுகளைக் குறைக்கும் விதத்தில், இந்த உப அலுவலகங்கள் திறக்கப்படவுள்ளன.

“அம்பாறை மாவட்டத்துக்கான உப அலுவலகம், அம்பாறை நகரில் கடந்த வாரம் திறந்து வைக்கப்பட்டது. மட்டக்களப்பு மாவட்டத்துக்கான உப அலுவலகம், அடுத்த வாரம் திறந்து வைக்கப்படவுள்ளது.

“ஆளுநரை சந்திக்க விரும்புவோர், ஆளுநர் செயலகத்துடன் தொடர்புகொண்டு, அதுபற்றி அறிந்துகொள்ள முடியும்” என்றார்.