கடல் மணலை அகற்ற நடவடிக்கை

அம்பாறை, ஒலுவில் மீன்பிடித் துறைமுக நுழைவாயிலில் கரையொதுங்கியுள்ள கடல் மணலை அகற்ற நடவடிக்கை எடுக்கப்பட்டுள்ளது.

அம்பாறை மாவட்ட மீனவர்களின் பிரதான கடற்றொழில் இறங்கு துறையாக ஒலுவில் மீன்பிடித் துறைமுகம் காணப்படுகிறது.

அம்பாறை மாவட்டம் மட்டுமல்லாது மட்டக்களப்பு, காலி, மாத்தறை, ஹம்மாந்தோட்டை களுத்துறை, புத்தளம் ஆகிய பிரதேசங்களைச் சேர்ந்த சுமார் ஐயாயிரத்துக்கு மேற்பட்ட மீனவர்களும் தமது தொழில் நடவடிக்கையை இங்கு மேற்கொண்டு வருகின்றனர்.

மீன்பிடித் துறைமுகத்தின் நுழைவாயில் கடந்த சில மாதங்களாக கடல் மணலால் மூடப்பட்டு காணப்படுவதால், மீனவர் சமூகம் பாரிய பின்னடைவை எதிர்கொண்டுள்ளனர் என்பதுடன், கடற்றொழில் நடவடிக்கைகளும் ஸ்தம்பித நிலையை அடைந்துள்ளதோடு, மீனவர் சமூகத்தினர் பொருளாதார ரீதியாக பெரும் இன்னல்களை எதிர்கொண்டுள்ளனர்.

இதனையடுத்து, துறைமுக நுழைவாயில் நிரம்பி காணப்படும் மணலை அகற்றுமாறு கோரி, ஜனாதிபதி மைத்திரிபால சிறிசேனவிடம் விடுத்த கோரிக்கைக்கமைய, இந்த நடவடிக்கை எடுக்கப்பட்டுள்ளது.