அழகான இடங்களின் ஆபத்துகளைப் பற்றி சிந்திப்பதில்லை

இந்த நாட்டில் ஒவ்வொரு ஆண்டும் சுமார் 800 பேர் நீரில் மூழ்கி இறப்பது அடையாளம் காணப்பட்டுள்ளது. இந்த கடுமையான ஆபத்தைப் பொதுமக்கள் கவனிக்காதது ஒரு பிரச்சினை. இதனால் பெறுமதியான உயிர்கள் அநியாயமாக இழக்கப்படுகின்றன.

இதில், இளம் வயதில் இடம்பெறும் சம்பவங்கள் என்றைக்குமே மறக்க முடியாதவையாகவே உள்ளன.பல்வேறு பகுதிகளில் உள்ள அழகான இடங்களின் புகைப்படங்கள் மற்றும் விளக்கங்கள் பேஸ்புக் போன்ற சமூக ஊடகங்களில் வெளியிடப்படுவதை காணலாம்.

அவற்றைப் பார்க்கும் பலர் அந்த இடங்களின் அழகைக் காண முயற்சிக்கின்றனர். வேடிக்கைக்காக இதுபோன்ற தெரியாத இடங்களுக்குச் செல்லும் பலர் அந்த இடங்களின் ஆபத்துகளைப் பற்றிச் சிந்திப்பதில்லை. 

இதன் விளைவாக, பல விடுமுறை நாட்கள் கொண்ட நீண்ட வார இறுதி நாட்களில் விபத்துகளும் மரணங்களும் சோகமான செய்திகளாகின்றன.
இலங்கையில் நீரில் மூழ்கி இறப்பவர்களில் பெரும்பாலோர் 
21 முதல் 60 வயதுக்குட்பட்டவர்கள் என்று தெரிவிக்கப்பட்டுள்ளது.

இதற்கிடையில், உலகளவில், நீரில் மூழ்கி இறப்பவர்களில் அதிக எண்ணிக்கை 1 முதல் 4 வயதுக்குட்பட்டவர்கள் என்று தெரிவிக்கப்பட்டுள்ளது. 1 முதல் 9 வயதுக்குட்பட்ட குழந்தைகளின் மரணத்திற்கு நீரில் மூழ்குவதே முக்கிய காரணம் என்றும் அடையாளம் காணப்பட்டுள்ளது.

2025 ஜூன் 1ஆம் திகதியன்று முல்லைத்தீவில் இடம்பெற்ற இருவேறு சம்பவங்களில், இரண்டு சிறுமிகளும், இளைஞன், சிறுவன் என நால்வர் உயிரிழந்த சோகமான சம்பவம் இடம்பெற்றுள்ளது. அதில்,  தாமரைக்  குளத்தில் தாமரை இலை பறிக்கச் 
சென்ற அளம்பில் வடக்கைச் சேர்ந்த 

25 வயதுடைய இளைஞனும் 10 வயதான சிறுவனும் உயிரிழந்துள்ளனர்.
அத்துடன், முல்லைத்தீவு குமுழமுனை கொட்டுக்கிணற்று பிள்ளையார் ஆலய கேணிக்குச் சென்றிருந்த நிலையில், நீரில் இறங்கி செல்ஃபி எடுத்தபோது, 15 வயதான சிறுமிகள் இருவர் நீரில் மூழ்கி, மரணமடைந்துள்ளனர்.

‘’இணையத்தில் அழகான இடங்களின் பல தகவல் புகைப்படங்கள் வெளியிடப்பட்டுள்ளன. மக்கள் அத்தகைய இடங்களுக்குச் செல்கிறார்கள். அவர்கள் சென்று வேடிக்கை பார்க்கிறார்கள். அவர்கள் ஒரு புதிய சூழலுக்கு, தெரியாத இடத்திற்குச் செல்லும்போது,​​எப்போதும் ஓர் ஆபத்து இருக்கிறது. ஆனால், நாம் ஆபத்தைப் பற்றி யோசிப்பதில்லை.

அத்தகைய இடத்திற்குச் செல்லும்போது உடல் ரீதியாக தயாராக இருப்பது முக்கியம்.’’  
“நமது நாட்டில் நீரில் மூழ்குவதற்கான காரணங்களில் மது அருந்துதல், பாதுகாப்பு அங்கி அல்லது உபகரணங்களைப் பயன்படுத்தாமல் இருத்தல் மற்றும் பாதுகாப்பற்ற செயல்கள் ஆகியவை அடங்கும். செல்ஃபி எடுப்பதும் ஓர் ஆபத்து. சிலர் மது அருந்திவிட்டு நீர்வீழ்ச்சிகள், ஏரிகள் அல்லது கடலில் நீந்தச் செல்கிறார்கள். இது மிகவும் ஆபத்தானது. போதை காரணமாக, தண்ணீர் நிரம்பி இல்லாத இடத்தில் கூட, அவர்கள் தண்ணீரில் விழுந்து மூழ்கி 
இறக்க நேரிடும்.

விடுமுறை நாட்களில் குடும்பத்துடன் அல்லது நண்பர்களுடன் நீர்நிலைகளுக்குச் செல்லும்போது அங்கு வைக்கப்பட்டிருக்கும் எச்சரிக்கை விளம்பரங்களைப் பார்வையிட்டு, அதில் குறிப்பிடப்பட்டிருக்கும் அறிவுறுத்தல்களை பின்பற்றவேண்டும். இவற்றையெல்லாம் விட, விடுமுறைகளை நீர்நிலைகளில் கழிப்பதைத் தவிர்ப்பதே சிறந்ததாகும் என்பதே எமது அவதானிப்பு.

2025/06/03