32 வது வருட ஐயப்ப மண்டல பூர்த்தி விழா

வரலாற்றுச் சிறப்புமிக்க மஸ்கெலியா ஸ்ரீ சண்முகநாத சுவாமி தேவஸ்தானத்தில் எழுந்தருளியிருக்கும் ஸ்ரீ ஐயப்ப சுவாமிக்கு 32 வது வருட மண்டல பூர்த்தி விழா மற்றும் ஸ்ரீ ஐயப்ப யாத்திரீகர்கள் நடாத்தும் மகா சக்தி பூஜை பெருவிழா சனிக்கிழமை (27) அன்று சிறப்பாக இடம்பெற்றிருந்தது.

நிகழும் குரோதி வருடம் மார்கழித் திங்கள் 12ம் நாள்  சனிக்கிழமை (27) காலை 8.00 மணி முதல் சபரிமலை ஸ்ரீ பம்பா கணபதியை நினைவு கூறும் வகையில் குழந்தையுள்ளம் கொண்ட அன்னதான பிரபுவுக்கு சக்தி பூஜை பெருவிழா, அன்னதானம் என்பன வெகு விமர்சையாக நடைபெற்றிருந்தது. 

காலை 10.00 மணிக்கு விநாயகப் பெருமானுக்கு விசேட திரவிய அபிஷேகம் இடம்பெற்று தொடர்ந்து ஐயப்ப சுவாமிக்கு விசேட அபிஷேகத்துடன் யாத்திரை மேற்கொள்ளவிருக்கும் சுவாமிகள் நடாத்தும் விசேட பஜனையும், சக்தி பூஜையின் 18ம் படி பூஜையும் நிறைவடைந்த பின்னர் அடியார்களுக்கு அன்னதானம் வழங்கி வைக்கப்பட்டது.

இந்த மண்டல பூர்த்தி பூஜை வழிபாட்டு நிகழ்வில், மஸ்கெலியாவின் மூத்த குருசுவாமி செல்வக்குமார் சுவாமி மற்றும் குருசுவாமிகளான சந்திரசேகரன், சந்திரகுமார், சக்தி, சண்முகா சுவாமி உட்பட பக்தர்கள் மற்றும் பொதுமக்கள் என பெருந்திரளானோர் பூஜையை சிறப்பித்தனர். 

செ.தி. பெருமாள்