100 கோடியை நெருங்கும் ’’தி காஷ்மீர் ஃபைல்ஸ்’’

ரசிகர்களின் மிகுந்த எதிர்ப்பார்ப்புக்கு மத்தியில் விவேக் அக்னிகோத்ரி இயக்கத்தில் ‘தி காஷ்மீர் பைல்ஸ்’ என்ற பொலிவூட் திரைப்படம் கடந்த 11 ஆம் திகதி  வெள்ளிக்கிழமை வெளியானது.

இத் திரைப்படமானது ”80-களின் பிற்பகுதியில் இடம்பெற்ற காஷ்மீர் கிளர்ச்சியின் போது அங்கிருந்த இந்துக்கள் காஷ்மீரத்தை விட்டு வெளியேறியதை ” அடிப்படையாகக் கொண்டது எடுக்கப்பட்டதாகத் தெரிவிக்கப்பட்டுள்ளது.

மேலும் இப்படத்தில் மிதுன் சக்கரவர்த்தி, அனுபம் கெர், தர்ஷன் குமார், பல்லவி ஜோஷி, சின்மயி மண்டலேகர், பிரகாஷ் பெலவாடி மற்றும் புனித் இஸ்ஸார் உள்ளிட்ட பலர் நடித்துள்ளனர். இப் படத்துக்கு அரியானா, குஜராத், கர்நாடகா மாநிலங்களில் வரிவிலக்கு அளிக்கப்பட்டுள்ளமை குறிப்பிடத்தக்கது.

இந்நிலையில் தற்போது இப் படமானது  நாடு முழுவதும் பல தரப்பினரிடமிருந்தும் பாராட்டுகளை பெற்று வருகிறது.

குறிப்பாக இந்தியப் பிரதமர் மோடி , மத்திய மந்திரி அமித்ஷா உள்ளிட்ட பலவேறு பாரதிய ஜனதாக் கட்சித்  தலைவர்கள் இந்த திரைப்படத்தை வெகுவாக பாராட்டி உள்ளனர்.

இந்நிலையில் தற்போது இந்த திரைப்படம் வெளியாகிய 6 தினங்களில் இந்தியாவில் மட்டும்  இந்திய மதிப்பில் 80 கோடி ரூபாய்  வசூல் சாதனை படைத்துள்ளதாகத் தெரிவிக்கப்பட்டுள்ளது.

மேலும் இன்று அல்லது நாளை இத் திரைப்படம் 100 கோடி ரூபாய்  வசூல் சாதனையை படைக்கும் என எதிர்பார்க்கபடுகிறது.