புதிய மசூதி கட்டுமானப்பணிகள் குடியரசு தினத்தன்று ஆரம்பம்

   அயோத்தி:

அயோத்தியில் இடிக்கப்பட்ட பாபர் மசூதிக்குப் பதிலாக புதிய மசூதி கட்டுவதற்கு உச்ச நீதிமன்றம் உத்தரவிட்டது. இதன்படி, புதிய மசூதி கட்டுமான திட்டப்பணி, நேற்றுமுன்தினம்  குடியரசு தினத்தன்று முறைப்படி தொடங்கியது. இந்நிகழ்வின்போது, மசூதி அறக்கட்டளை தலைவர் ஜுபார் அஹமது பாரூக்கி, தேசியக்கொடியை ஏற்றி வைத்தார். 9 மரக்கன்றுகளை அறக்கட்டளை உறுப்பினர்கள் நட்டினர்.

மசூதி கட்டுமானப் பணியை மேற்கொள்ள, இந்தோ-இஸ்லாமிய கலாசார கழகம் என்ற அறக்கட்டளையையும் சன்னி வக்பு வாரியம் அமைத்தது.

அறக்கட்டளை செயலாளர் அத்தார் ஹுசைன் கூறுகையில், ‘மசூதி கட்டுமானப் பணிக்கான அடிக்கல் நாட்டுவதற்கு குடியரசு தினத்தை எங்கள் அறக்கட்டளை தேர்ந்தெடுத்தது. காரணம், 70 ஆண்டுகளுக்கு முன்பு இந்த நாளில்தான் நமது அரசியல் சாசனம் அமுலுக்கு வந்தது.

அரசியல் சாசனத்தின் அடித்தளமாக அமைந்த பன்முகத்தன்மைதான், புதியமசூதியின் அடிநாதமும் கூட’ என்றார்.மேலும் அவர், ‘புதிய மசூதி, பாபர் மசூதியை விட பெரிதாக இருக்கும். ஆனால் அதேபோன்ற தோற்றத்தில் அமைந்திருக்காது’ என்றார்.