அமெரிக்கப் படைகள் ஈரானைச் சுற்றியே இருக்கும்: ட்ரம்ப் எச்சரிக்கை

ஈரான் "உண்மையான உடன்படிக்கைக்கு"  முழுமையாகக் கட்டுப்படும் வரை, அந்நாட்டைச் சுற்றியுள்ள பகுதிகளில் அமெரிக்கப் படைகள் நிலைநிறுத்தப்பட்டிருக்கும் என்று அதிபர் டொனால்ட் ட்ரம்ப் புதன்கிழமை தெரிவித்தார். ஏதேனும் மீறல்கள் இடம்பெற்றால், இதுவரை கண்டிராத அளவிலான மிகப்பெரிய இராணுவத் தாக்குதல் நடத்தப்படும் என்றும் அவர் எச்சரித்துள்ளார்.

தனது 'ட்ரூத் சோஷியல்' (Truth Social) தளத்தில் இது குறித்து பதிவிட்டுள்ள ட்ரம்ப், "உண்மையான உடன்படிக்கை எட்டப்பட்டு, அது முழுமையாக நடைமுறைப்படுத்தப்படும் வரை அமெரிக்கக் கப்பல்கள், விமானங்கள் மற்றும் இராணுவ வீரர்கள் ஈரானைச் சுற்றியுள்ள பகுதிகளில் நிலைத்திருப்பார்கள். ஏதேனும் ஒரு காரணத்திற்காக இது மீறப்பட்டால், முன்னெப்போதும் கண்டிராத வகையில் மிகப்பெரிய மற்றும் வலிமையான தாக்குதல் (Shootin' starts) ஆரம்பமாகும்," என்று குறிப்பிட்டுள்ளார்.

ஈரான் அணு ஆயுதங்களை உருவாக்கக் கூடாது என்பதும், ஹார்முஸ் நீரிணை (Strait of Hormuz) வர்த்தகக் கப்பல் போக்குவரத்திற்குப் பாதுகாப்பானதாக இருக்க வேண்டும் என்பதும் ஏற்கனவே ஒப்புக்கொள்ளப்பட்ட விடயங்கள் என்று ட்ரம்ப் மீண்டும் வலியுறுத்தினார். "எமது மாபெரும் இராணுவம் அடுத்த கட்டத் தாக்குதலுக்குத் தயாராகவும், அதேவேளை ஓய்வெடுத்தும் வருகின்றது. அமெரிக்கா மீண்டும் வந்துவிட்டது (AMERICA IS BACK!)" என்றும் அவர் பதிவிட்டுள்ளார்.

பின்னணி மற்றும் தற்போதைய நிலை:

பாகிஸ்தானின் மத்தியஸ்தத்துடன் வாஷிங்டன் மற்றும் தெஹ்ரான் இடையே இரண்டு வார கால போர்நிறுத்தம் எட்டப்பட்ட ஒரு நாளுக்குப் பிறகு ட்ரம்ப்பின் இந்த அறிக்கை வெளியாகியுள்ளது. கடந்த ஆறு வாரங்களாகத் தொடர்ந்த மோதலை இந்தப் போர்நிறுத்தம் தற்காலிகமாக நிறுத்தியுள்ளதுடன், ஹார்முஸ் நீரிணையில் எரிசக்தி விநியோகம் மீண்டும் தொடங்கலாம் என்ற நம்பிக்கையால் உலகளாவிய சந்தையில் சிறிய முன்னேற்றம் ஏற்பட்டுள்ளது.

ஹார்முஸ் நீரிணையில் பாதுகாப்பான பயணம் சாத்தியம் என்றும், ஆனால் அது ஈரானிய ஆயுதப் படைகளின் ஒருங்கிணைப்புக்கு உட்பட்டது என்றும் ஈரான் தெரிவித்துள்ளது.

இஸ்ரேலின் நிலைப்பாடு:

ஈரான் மீதான தாக்குதல்களை நிறுத்தும் ட்ரம்ப்பின் முடிவை இஸ்ரேல் ஆதரித்துள்ளது. இருப்பினும், இந்தப் போர்நிறுத்தம் லெபனானுக்குப் பொருந்தாது என்று இஸ்ரேல் திட்டவட்டமாகத் தெரிவித்துள்ளது. இதற்கமைய, கடந்த பெப்ரவரி மாதம் போர் தொடங்கியதிலிருந்து லெபனான் மீது புதன்கிழமை நடத்தப்பட்ட மிகக் கடுமையான தாக்குதல்களில் குறைந்தது 182 பேர் கொல்லப்பட்டுள்ளனர்.

பேச்சுவார்த்தையில் சிக்கல்:

இஸ்ரேலின் இந்தத் தாக்குதல்கள் காரணமாக, அமெரிக்காவுடன் நிரந்தர அமைதி ஒப்பந்தத்தை எட்டுவதற்கான பேச்சுவார்த்தைகளைத் தொடர்வது "நியாயமற்றது" என்று ஈரான் எச்சரித்துள்ளது. இது தற்போதைய போர்நிறுத்தத்தின் பலவீனத்தை வெளிப்படுத்தியுள்ளது. எவ்வாறாயினும், அமெரிக்கா மற்றும் ஈரான் பிரதிநிதிகள் எதிர்வரும் வெள்ளிக்கிழமை இஸ்லாமாபாத்தில் பேச்சுவார்த்தை நடத்துவார்கள் என்று எதிர்பார்க்கப்படுகிறது.