வெளவால்களிடம் புதிய வகை கரோனா

தாய்லாந்தில் உள்ள வவ்வால்களிடம் புதிய வகை கரோனா வைரஸ் ஒன்றைத் தாய்லாந்து விஞ்ஞானிகள் கண்டறிந்துள்ளனர். இது குறித்த விரிவான தகவல்கள் 'செல்' (Cell) என்ற சர்வதேச மருத்துவ இதழில் வெளியாகியுள்ள கட்டுரையில் குறிப்பிடப்பட்டுள்ளன.

தாய்லாந்து வவ்வால்களிடம் கண்டறியப்பட்டுள்ள இந்தப் புதிய வைரஸ், மனிதர்களைத் தொற்றும் ஆற்றலைக் கொண்டிருக்கலாம் என விஞ்ஞானிகள் கருதுகின்றனர். தற்போது இந்த வைரஸ் மக்களிடையே பரவி வருவதற்கான ஆதாரங்கள் எதுவும் இல்லை என்றாலும், விலங்குகளிடம் பரவும் இத்தகைய வைரஸ்களைத் தொடர்ந்து கண்காணிப்பது மிகவும் அவசியம் என அந்தக் கட்டுரையில் வலியுறுத்தப்பட்டுள்ளது.

தொற்றும் அபாயம்: இந்த ஆய்வின் போது, வைரஸானது மனித உயிரணுக்களில் உள்ள 'ஏசிஇ2' (ACE2) என்ற புரதங்களுடன் இணையக்கூடிய தன்மையைக் கொண்டிருப்பதை ஆராய்ச்சியாளர்கள் கவனித்துள்ளனர். இதன் பொருள், ஒரு பெருந்தொற்று உடனடியாக ஏற்படும் என்பதல்ல; மாறாக, இது விலங்குகளிடம் இருந்து மனிதர்களுக்குப் பரவக்கூடிய உயிரியல் வாய்ப்பு இருப்பதையே காட்டுகிறது.

இவ்வாறான வைரஸ்களை முன்கூட்டியே கண்டறிந்து கண்காணிப்பதன் மூலம், எதிர்காலத்தில் ஏற்படக்கூடிய சுகாதார அச்சுறுத்தல்களைத் தவிர்க்க முடியும் என விஞ்ஞானிகள் நம்பிக்கை வெளியிட்டுள்ளனர்.