கதியோனின் அபார பந்துவீச்சினால் ஸ்கந்தா வெற்றி

A.P.Mathan / 2014 பெப்ரவரி 28 , மு.ப. 09:32 - 0 - {{hitsCtrl.values.hits}}

-நா.நவரத்தினராசா

கே.கே.கதியோன் தனது துல்லியமான பந்துவீச்சின் மூலம் இரண்டு இனிங்ஸிலும் 10 இலக்குகளைச் சாய்க்க, வீரர்களின் போர் துடுப்பாட்டப் போட்டியில் சுன்னாகம் ஸ்கந்தவரோதயக் கல்லூரி அணி 10 இலக்குகளால் அபார வெற்றியீட்டியது.

தெல்லிப்பளை மகாஜனக் கல்லூரிக்கும் சுன்னாகம் ஸ்கந்தவரோதயக் கல்லூரிக்கும் இடையிலான 14 ஆவது வீரர்களின் போர் துடுப்பாட்டப் போட்டி நேற்று முன்தினமும் (26), நேற்றும் (27) மகாஜனக் கல்லூரி மைதானத்தில் நடைபெற்றது.

இது வரையில் நடைபெற்ற 13 “வீரர்களின் போரில்” இரு அணிகளும் தலா 3 போட்டிகளில் வெற்றிபெற்றிருந்ததுடன், 7 போட்டிகள் சமநிலையில் முடிவடைந்திருந்தன. அத்துடன் இறுதியாக கடந்த 2013ஆம் ஆண்டு நடைபெற்ற போட்டியில் மகாஜனக் கல்லூரி அணி வெற்றிபெற்றிருந்தது.

இம்முறை போட்டிகளில் ஸ்கந்தவரோதயக் கல்லூரி அணி ஜே.ஜனக்சன் தலைமையிலும், மகாஜனக் கல்லூரி அணி ஜே.ஜனந்தனின் தலைமையிலும் களமிறங்கின.

நாணயச் சுழற்சியில் வெற்றிபெற்ற மகாஜனக் கல்லூரி அணி, முதலில் துடுப்பெடுத்தாடக் களமிறங்கியது. எனினும் மோசமான துடுப்பாட்டம் காரணமாக 23.3 பந்துபரிமாற்றங்களில் 78 ஓட்டங்களுக்குச் சகல இலக்குகளையும் இழந்தது.

துடுப்பாட்டத்தில் ரி.டிலோசன் 27, ஜே.மயூரன் 18, எஸ்.கபிலன் 09 ஆகிய ஓட்டங்களைப் பெற்றுக்கொடுத்தனர்.

பந்துவீச்சில் ஸ்கந்தவரோதயக் கல்லூரி அணி சார்பாக கே.கே.கதியோன் 5 (16), கே.பிரசாத் 3 (10), பி.சுஜிதரன் 2 (07) இலக்குகளைக் கைப்பற்றினார்.

பதிலுக்குத் தமது முதலாவது இனிங்ஸிற்காகத் துடுப்பெடுத்தாடக் களமிறங்கிய ஸ்கந்தவரோதயக் கல்லூரி அணி 46.2 பந்துபரிமாற்றங்களில் 232 ஓட்டங்களுக்குச் சகல இலக்குகளையும் இழந்தது.

துடுப்பாட்டத்தில் ரி.சரத்குமார் 26 பந்துகளில் எட்டு நான்குகள், நான்கு ஆறுகளுடன் 77 ஓட்டங்களையும், ஜெ.ஜனக்சன் 67, பி.சுஜிதரன் 32, கே.கே.கதியோன் 27, கே.சயந்தன் 18 ஓட்டங்களையும் பெற்றுக்கொடுத்தனர்.

பந்துவீச்சில் மகாஜனக் கல்லூரி அணி சார்பாக ஜெ.ஜனந்தன் 4 (61), ஆர்.ரிஷாத் 3 (38), எஸ்.கஜந்தன் 2 (44) இலக்குகளையும் கைப்பற்றினார்கள்.

154 ஓட்டங்கள் பின்னிலையில் தமது இரண்டாவது இனிங்ஸிக்காகத் துடுப்பெடுத்தாடக் களமிறங்கிய மகாஜனக் கல்லூரி அணி நேற்றைய ஆட்டநேர முடிவின் போது, 21 பந்துபரிமாற்றங்களில் 4 இலக்குகளை இழந்து 66 ஓட்டங்களைப் பெற்றிருந்தது.

தொடர்ந்து இன்று (27) இரண்டவாது நாளாக நடைபெற்ற போட்டியில், மகாஜனக் கல்லூரி அணி அடுத்தடுத்து இலக்குகளை இழந்து வந்தது. இறுதியில் 45.3 பந்துபரிமாற்றங்களில் 156 ஓட்டங்களுக்குச் சகல இலக்குகளையும் இழந்தது.

துடுப்பாட்டத்தில் ரி.டிலோசன் 36 ஆர்.ரிசோத் 34 எஸ்.கபிலன் 17 ஜெ.ஜனந்தன் 16 எம்.பவன் 13 ஓட்டங்களைப் பெற்றுக்கொடுத்தனர்.

பந்துவீச்சில் ஸ்கந்தவரோதயக் கல்லூரி அணி சார்பாக கே.கே.கதியோன் 5 (49), ஜே.ஜனக்சன் 2 (19), கே.பிரசாத் 2 (05) இலக்குகளைக் கைப்பற்றினார்கள்.

3 ஓட்டங்கள் எடுத்தால் வெற்றியென்று இரண்டாவது இனிங்ஸிற்காகத் துடுப்பெடுத்தாடக் களமிறங்கிய ஸ்கந்தவரோதயக் கல்லூரி அணி, 0.3 பந்துபரிமாற்றங்களில் இலக்குகள் இழப்பின்றி அந்த வெற்றியினை பெற்றுக்கொண்டது.

வீரர்களின் போரில் சிறந்த துடுப்பாட்ட வீரராக ஸ்கந்தவரோதயாக் கல்லூரியைச் சேர்ந்த ரி.சரத்குமாரும், சிறந்த களத்தடுப்பாளராக மகாஜனக் கல்லூரியின் ரி.டிலோசனும், சகலதுறை வீரராக ஸ்கந்தவரோதயாக் கல்லூரியைச் சேர்ந்த ஜே.ஜனக்சனும், சிறந்த பந்துவீச்சாளர் மற்றும் போட்டியின் நாயகனாகவும் ஸ்கந்தவரோதயக் கல்லூரியில் கே.கே.கதியோன் தெரிவு செய்யப்பட்டார்.

Comments - 0

அன்புள்ள வாசகர்களே,
நீங்கள் தெரிவிக்கும் கருத்துகளுக்கு நிர்வாகம் எவ்விதத்திலும் பொறுப்பாகாது. அவை உங்களின் தனிப்பட்ட கருத்துகளாகும். உங்களின் கருத்துகள் ஆசிரியரின் தகுந்த தணிக்கைக்குப் பிறகே பதிவேற்றம் செய்யப்படும் என்பதைக் கவனத்திற்கொள்க. உங்கள் யோசனைகளையும் எங்களுக்கு அனுப்புங்கள். .