சம்பியனான பேத்தாழை இளந்தளிர்

- எச்.எம்.எம். பர்ஸான்

கோறளைப்பற்று மத்தி, வாழைச்சேனை பிரதேச செயலகப் பிரிவுக்குட்பட்ட தியாவட்டவான் அர் ரஷாத் விளையாட்டுக் கழகம் நடாத்திய மென்பந்தாட்ட கிரிக்கெட் தொடரில் பேத்தாழை இளந்தளிர் அணி சம்பியனானது.

17 அணிகள் பங்குபற்றிய இத்தொடரின் இறுதிப் போட்டியானது தியாவட்டவன் அரஃபா வித்தியாலய மைதானத்தில் அண்மையில் நடைபெற்ற நிலையில், அர் ரஷாத் அணியை வென்றே இளந்தளிர் சம்பியனானது.

இப்போட்டியில் முதலில் துடுப்பெடுத்தாடிய இளந்தளிர் அணி ஐந்து ஓவர்கள் முடிவில் 2 விக்கெட்டுகளை இழந்து 87 ஓட்டங்களைப் பெற்றது. பதிலுக்கு 88 ஓட்டங்களை வெற்றியிலக்காகக் கொண்டு துடுப்பெடுத்தாடிய அர் ரஷாத் அணி, ஐந்து ஓவர்களில் 3 விக்கெட்டுகளை இழந்து 73 ஓட்டங்களையே பெற்று 14 ஓட்டங்களால் தோல்வியடைந்தது.