உலக அமைதிப் பயணம்: விமானத்தில் பயணித்த ’ஆலோகா’ நாய்

  உலக அமைதிக்கான “ஏகிப்பஸிக்கோ” (Ehipassiko) எனும் உலகளாவிய நடைப்பயணத்தில் பங்கேற்பதற்காக, அமெரிக்காவைத் தளமாகக் கொண்ட வியட்நாமியத் துறவிகள் குழுவினர் இன்று (21) அதிகாலை இலங்கை வந்தடைந்தனர்.

  துறவிகள் பன்னாகர மற்றும் ரதனகுண தலைமையிலான இக்குழுவினர், துருக்கியின் இஸ்தான்புல் நகரில் இருந்து அதிகாலை 5.47 மணிக்கு பண்டாரநாயக்க சர்வதேச விமான நிலையத்தை (BIA) வந்தடைந்தனர். இவர்களை மத மற்றும் கலாசார விவகார அமைச்சர் டாக்டர் ஹினிதும சுனில் செனவி, ஜனாதிபதியின் செயலாளர் டாக்டர் சனத் நந்திக குமார மற்றும் அரசு அதிகாரிகள் சிறப்பு விருந்தினர் அறையில் வரவேற்றனர்.

இந்த வருகையின் மிகவும் சுவாரஸ்யமான அம்சம், துறவிகளுடன் வந்த 'ஆலோகா' (Aloka) என்ற நாய் ஆகும்.

 ஆலோகா மற்ற பயணிகளைப் போலவே விமானத்தில் ஒரு இருக்கையில் அமர்ந்து பயணம் செய்துள்ளது.

விமான நிலையம் வந்தடைந்ததும், ஆலோகா சிறப்பு விருந்தினர் பகுதிக்கு அழைத்துச் செல்லப்பட்டது. அங்கு விலங்கு தனிமைப்படுத்தல் நிறுவன அதிகாரிகளால் அதற்கு உணவும் பானங்களும் வழங்கப்பட்டன.

கால்நடை மருத்துவ அதிகாரிகள் ரத்தப் பரிசோதனை உள்ளிட்ட முழுமையான உடல்நலப் பரிசோதனைகளை மேற்கொண்டனர்.

  மற்ற நாடுகளில் இத்தகைய மருத்துவப் பரிசோதனைகளுக்கு ஒத்துழைக்க மறுத்த ஆலோகா, இலங்கையில் உள்ள கால்நடை ஊழியர்களின் கனிவான அணுகுமுறை மற்றும் அதன் உரிமையாளர் பன்னாகர தேரரின் அரவணைப்பால் மிகவும் அமைதியாகப் பரிசோதனைகளைச் செய்துகொண்டது.

முன்னெச்சரிக்கை நடவடிக்கையாக ஆலோகாவுக்காக பிரத்யேக ஆம்புலன்ஸ் (Ambulance) வசதியும் தயார் நிலையில் வைக்கப்பட்டிருந்தது. இருப்பினும், அதன் அவசியம் ஏற்படாததால், ஆலோகா மற்ற துறவிகளுடன் இணைந்து பேருந்தில் ஏறி விமான நிலையத்திலிருந்து புறப்பட்டது.

  இந்தக் குழுவினர் இலங்கையின் பல்வேறு பகுதிகளுக்குச் சென்று, உலக அமைதி, நல்லிணக்கம் மற்றும் ஆன்மீகச் சிந்தனைகளை வலியுறுத்தி 'ஏகிப்பஸிக்கோ' அமைதி நடைப்பயணத்தை மேற்கொள்ளவுள்ளனர்.