கோட்டையை பிடிக்க அதிரடி காட்டும் விஜய்; முடியுமா?

2026 தமிழக சட்டமன்றத் தேர்தல் களம் இப்போதே சூடுபிடிக்கத் ஆரம்பித்துள்ள நிலையில், சென்னையில் உள்ள 22 தொகுதிகளில் நிலவும் அரசியல் சூழல் குறித்து சமீபத்திய கருத்துக்கணிப்பு முடிவுகள் வெளியாகியுள்ளன. 

இதில், ஆளும் கட்சியான திமுக மற்றும் பிரதான எதிர்க்கட்சியான அதிமுக ஆகியவற்றுக்கு இணையாகத் தமிழக வெற்றிக் கழகம் மிகப்பெரிய தாக்கத்தை ஏற்படுத்தியுள்ளது தெரியவந்துள்ளது.

குறிப்பாக, இளைஞர்கள் மற்றும் முதல்முறை வாக்காளர்களின் ஆதரவு விஜய்க்குப் பெருமளவில் இருப்பதால், சென்னையின் பல தொகுதிகளில் தவெக முதலிடத்தைப் பிடிக்க வாய்ப்புள்ளதாக அந்த ஆய்வு தெரிவிக்கிறது.

சென்னையின் ஆர்.கே.நகர், பெரம்பூர், கொளத்தூர் மற்றும் எழும்பூர் போன்ற தொகுதிகளில் தவெக-வின் வாக்கு சதவீதம் கணிசமாக உயர்ந்துள்ளது. திமுகவின் கோட்டையாகக் கருதப்படும் சென்னையிலும், தவெக-வின் உறுப்பினர் சேர்க்கை மற்றும் சமீபத்திய பொதுக்கூட்டங்கள் ஏற்படுத்திய தாக்கம் எதிரொலிப்பதாகக் கூறப்படுகிறது. 

விஜய்யின் அரசியல் வருகை வெறும் திரைப்பற்றுடன் நின்றுவிடாமல், களப்பணியிலும் அவரது தொண்டர்கள் தீவிரம் காட்டி வருவதால், பாரம்பரியக் கட்சிகளான திமுக மற்றும் அதிமுக ஆகியவை தங்களது தேர்தல் வியூகங்களை மாற்ற வேண்டிய கட்டாயத்திற்குத் தள்ளப்பட்டுள்ளன.

இருப்பினும், தவெக-வின் இந்த எழுச்சி தேர்தலின் போது வெற்றியாக மாறுமா என்ற கேள்வியும் எழுந்துள்ளது. வாக்குகள் சிதறுவதால் அது எந்தக் கட்சிக்குச் சாதகமாக அமையும் என்பது குறித்து அரசியல் விமர்சகர்கள் விவாதித்து வருகின்றனர். சென்னையில் தவெக தனித்துப் போட்டியிட்டால் சுமார் 10 முதல் 12 தொகுதிகளில் கடும் போட்டியை உருவாக்கும் என்றும், ஒருவேளை வலுவான கூட்டணி அமைந்தால் சென்னையின் பெரும்பான்மையான தொகுதிகளைக் கைப்பற்றும் வாய்ப்பு உள்ளதாகவும் கருத்துக்கணிப்புகள் சுட்டிக்காட்டுகின்றன. பெண்களின் வாக்குகள் மற்றும் நடுநிலை வாக்காளர்களின் முடிவு தவெக-வின் வெற்றியைத் தீர்மானிக்கும் காரணியாக இருக்கும்.

தவெக தலைவர் விஜய், மாவட்ட வாரியாக நிர்வாகிகளைச் சந்தித்து ஆலோசனைகளை வழங்கி வருவதோடு, தொகுதிகளில் நிலவும் அடிப்படைப் பிரச்சினைகளைத் தொகுக்குமாறு அறிவுறுத்தியுள்ளார்.

சென்னையைப் பொறுத்தவரை போக்குவரத்து நெரிசல் மற்றும் மழைநீர் வடிகால் பிரச்சினைகளை முன்வைத்து தவெக தனது பிரசாரத்தைத் திட்டமிட்டுள்ளது. 

எதிர்வரும் தேர்தல்களில் தவெக ஒரு 'கிங் மேக்கராக' உருவெடுக்கும் என்பதை இந்தக் கருத்துக்கணிப்பு முடிவுகள் உறுதி செய்கின்றன. இதனால் 2026 தேர்தல் களம் முன்பை விட விறுவிறுப்பாகவும், மும்முனைப் போட்டியாகவும் மாறும் என எதிர்பார்க்கப்படுகிறது.