நான்கு வேட்பாளர்களுக்கு விசேட பாதுகாப்பு

ஜனாதிபதி தேர்தலில் போட்டியிடும் பிரதான வேட்பாளர்கள் நால்வருக்கு விசேட பாதுகாப்பு  பெற்றுக்கொடுக்க நடவடிக்கை எடுக்கப்பட்டுள்ளதாக சட்டம் மற்றும் ஒழுங்கு அமைச்சு தெரிவித்துள்ளது.

பொலிஸ்மா அதிபரின் அறிவுரையின்படி, தேசிய பொலிஸ் ஆணைக்குழுவின் அனுமதியுடன் புதிய பாதுகாப்பு தொடர்பாளர்களை நியமிக்க நடவடிக்கை எடுக்கப்பட்டுள்ளதாக அமைச்சின் பேச்சாளர் ஒருவர் தெரிவித்துள்ளார்.

கோட்டாய ராஜபக்ஷ, சஜித் பிரேமதாச, அநுரகுமார திசாநாயக்க, மஹேஷ் சேனாநாயக ஆகியோருக்கு விசேட பாதுகாப்பு வழங்குமாறு புலனாய்வு பிரிவினரால் பொலிஸார் மற்றும் தேர்தல்கள் ஆணைக்குழுவுக்கு அறிவிக்கப்பட்டுள்ளதாக தகவல்கள் வெளியாகியுள்ளன.

எனவே, குறித்த வேட்பாளர்களுக்கு சிரேஷ்ட பொலிஸ் அத்தியட்சகர் இருவர் மற்றும் பொலிஸ் அத்தியட்சகர் இருவர் புதிய பாதுகாப்பு தொடர்பாளர்களாக நியமிக்கப்பட்டுள்ளதாக சட்டம் மற்றும் ஒழுங்கு அமைச்சு தெரிவித்துள்ளது.

ஜனாதிபதி தேர்தலில் போட்டியிடும் வேட்பாளர்களுக்கு தேவையான பாதுகாப்பினை பெற்றுக்கொடுக்குமாறு ஜனாதிபதி மைத்திரிபால சிறிசேன, அண்மையில் இடம்பெற்ற தேசிய பாதுகாப்பு சபை கூட்டத்தில் அறிவுறுத்தியிருந்தமை குறிப்பிடத்தக்கது.