சம்பூர் மக்கள் மீள்குடியேற்றத்துக்கு இணங்காவிடின் அகதி அந்தஸ்து பறிக்கப்படும்: கிழக்கு மாகாண ஆளுநர்

(அமதோரு அமரஜீவ)

திருகோணமலை, சம்பூர் பிரதேசத்திலிருந்து யுத்தம் காரணமாக இடம்பெயர்ந்து மூதூர் நலன்புரி முகாம்களில் தங்கியுள்ள மக்கள் C ரீதியில் அவர்களுக்கு வழங்கப்பட்டுள்ள அகதி அந்தஸ்து பறிக்கப்படும் என கிழக்கு மாகாண ஆளுநர் மொகான் விஜேவிக்கிரம எச்சரிக்கை விடுத்துள்ளார். 

மேற்படி மக்கள் மீள்குடியேறுவதற்கான அனைத்து வசதி வாய்ப்புக்களும் ஏற்படுத்திக் கொடுக்கப்பட்டுள்ளன. இந்நிலையிலும் அவர்கள் மீள்குடியேற்றத்துக்கு இணங்கவில்லையாயின் அவர்களுக்கு எதிராக நடவடிக்கை எடுக்கப்படும் எனவும் அவர் குறிப்பிட்டார்.

யுத்தம் காரணமாக சம்பூரிலிருந்து இடம்பெயர்ந்த சுமார் 900 குடும்பங்களைச் சேர்ந்த மக்கள் மூதூரில் அமைக்கப்பட்டுள்ள 3 தற்காலிக நலன்புரி முகாம்களில் தங்கவைக்கப்பட்டுள்ளனர்.

சம்பூர் பிரதேசம் ஆரம்பத்தில் பாதுகாப்பு வலயமாகக் காணப்பட்ட நிலையில் தற்போது அது பொருளாதார மத்திய நிலையமாக பிரகடனப்படுத்தப்பட்டுள்ளது. இதனால் அங்கிருந்து இடம்பெயர்ந்த மக்களை அப்பிரதேசத்திலேயே மீள்குடியேற்றம் செய்யாது வேறு பிரதேசமொன்றில் மீள்குடியேற்ற அரசாங்கம் நடவடிக்கை எடுத்துள்ளது.

இந்நிலையில், இம்மக்களின் மீள்குடியேற்றம் தொடர்பில் ஆராயும் கூட்டமொன்று நேற்று வெள்ளிக்கிழமை கிழக்கு மாகாண ஆளுநர் தலைமையில் நடைபெற்றது. இதில் கலந்துகொண்டு கருத்து தெரிவிக்கும் போதே அவர் மேற்கண்டவாறு குறிப்பிட்டார்.