மாணவர்களுக்கு போதை மாத்திரை விற்பனை செய்தவர் மறியலில்

-ஒலுமுதீன்  கியாஸ் 

கிண்ணியா  பிரதேசத்தில் பாடசாலை மாணவர்களுக்கு  போதை மாத்திரைகளை  விற்பனை  செய்த குற்றச்சாட்டின் பேரில் கைது செய்யப்பட்ட  நபரை அடுத்த மாதம் 2ஆம் திகதி வரை விளக்கமறியலில் வைக்குமாறு, திருகோணமலை நீதிமன்ற நீதவான் எம்.எச்.எம்.ஹம்ஸா நேற்று (27)  உத்தரவிட்டார்.

கிண்ணியா - மட்டக்களப்பு வீதியில் அமைந்துள்ள தி/ இக்ரா  வித்தியாலத்துக்கு முன்னால், சைக்கிளில்  நேற்று முன்தினம் (26)  பாடசாலை விடுகின்ற நேரத்தில் போதை மாத்திரை  விற்பனை செய்து கொண்டிருந்த சமயத்தில் குறித்த நபர் கைதுசெய்யப்பட்டார். 

இவர்  கிண்ணியா , ரியாத் நகரைச் சேர்ந்த 32 வயதான குடும்பஸ்தர் என பொலிஸார் தெரிவித்தனர்.

இவரிடமிருந்து,  மூன்று வகையான போதை மாத்திரைகள் கைப்பற்றப்பட்டதாகவும் குறித்த நபர் ஏற்கெனவே போதை மாத்திரை விற்பனையில் ஈடுபட்டதற்காக நீதி மன்றத்தில் வழக்குத் தாக்கல் செய்யப்பட்டிருப்பதாகவும் பொலிஸார் தெரிவித்தனர்.