இலங்கையை வென்ற அவுஸ்திரேலியா

அவுஸ்திரேலியாவுக்கு எதிரான இரண்டாவது இருபதுக்கு – 20 சர்வதேசப் போட்டியில் இலங்கை தோற்றது.

ஐந்து போட்டிகள் கொண்ட இத்தொடரில், சிட்னியில் இன்று நடைபெற்ற இரண்டாவது போட்டியின் நாணயச் சுழற்சியில் வென்ற இலங்கையணியின் தலைவர் தசுன் ஷானக, தமதணி முதலில் களத்தடுப்பிலீடுபடும் என அறிவித்தார். இலங்கையணி சார்பாக வேகப்பந்துவீச்சாளர் நுவான் துஷார அறிமுகத்தை மேற்கொண்டிருந்தார்.

முதலில் துடுப்பெடுத்தாடிய அவுஸ்திரேலியா, ஜொஷ் இங்லிஷின் 48 (32) ஓட்டங்களோடு 20 ஓவர்களில் 6 விக்கெட்டுகளை இழந்து 164 ஓட்டங்களைப் பெற்றது. பந்துவீச்சில், துஷ்மந்த சமீர 4-0-30-2, வனிடு ஹஸரங்க 4-0-33-2, மஹேஷ் தீக்‌ஷன 4-0-31-1, சாமிக கருணாரத்ன 4-0-28-0, நுவான் துஷார 4-0-40-1 என்ற பெறுதிகளைக் கொண்டிருந்தனர்.

பதிலுக்கு, 165 ஓட்டங்களை வெற்றியிலக்காகக் கொண்டு துடுப்பெடுத்தாடிய இலங்கை, பதும் நிஸங்கவின் 73 (53), அணித்தலைவர் தசுன் ஷானகவின் 34 (19), வனிடு ஹஸரங்கவின் 13 (09), துஷ்மந்த சமீரவின் ஆட்டமிழக்காத 4 (1), மஹேஷ் தீக்‌ஷனவின் ஆட்டமிழக்காத 6 (2) ஓட்டங்களோடு 20 ஓவர்களில் 8 விக்கெட்டுகளை இழந்து 164 ஓட்டங்களைப் பெற்றது. பந்துவீச்சில், ஜொஷ் ஹேசில்வூட் 4-0-22-3, அடம் ஸாம்பா 4-0-26-1, பற் கமின்ஸ் 4-0-30-1 என்ற பெறுதிகளைக் கொண்டிருந்தனர்.

அந்தவகையில், போட்டி சமநிலையில் முடிவடைந்த நிலை, ஜொஷ் ஹேசில்வூட் வீசிய சுப்பர் ஓவரில் தசுன் ஷானகவும், தினேஷ் சந்திமாலும் களமிறங்கி ஐந்து ஓட்டங்களை மாத்திரமே பெற்றனர்.

பதிலுக்கு, ஆறு ஓட்டங்களை வெற்றியிலக்காகக் கொண்டு துடுப்பெடுத்தாடிய அவுஸ்திரேலியா, வனிடு ஹஸரங்க வீசிய ஓவரின் இரண்டாவது, மூன்றாவது பந்துகளில் நான்கு ஓட்டங்களை மார்க்கஸ் ஸ்டொய்னிஸ் பெற்ற நிலையில் வென்றது.

இப்போட்டியின் நாயகனாக ஜொஷ் ஹேசில்வூட் தெரிவானார்.