சமநிலையில் சிற்றி-லீட்ஸ் போட்டி

இங்கிலாந்து கால்பந்தாட்டக் கழகங்களுக்கிடையிலான பிறீமியர் லீக் தொடரில், லீட்ஸ் யுனைட்டெட்டின் மைதானத்தில் நேற்றிரவு நடைபெற்ற அவ்வணிக்கும் மன்செஸ்டர் சிற்றிக்குமிடையிலான போட்டியானது 1-1 என்ற கோல் கணக்கில் சமநிலையில் முடிவடைந்திருந்தது.

மன்செஸ்டர் சிற்றி சார்பாகப் பெறப்பட்ட கோலை ரஹீம் ஸ்டேர்லிங்க் பெற்றதோடு, லீட்ஸ் யுனைட்டெட் சார்பாகப் பெறப்பட்ட கோலை றொட்றிகோ பெற்றிருந்தார்.

இதேவேளை, எவெர்ற்றனின் மைதானத்தில் நடைபெற்ற அவ்வணிக்கும் பிறைட்டன் அன்ட் ஹொவ் அல்பியனுக்குமிடையிலான போட்டியில் 4-2 என்ற கோல் கணக்கில் எவெர்ற்றன் வென்றது. எவெர்ற்றன் சார்பாக, ஜேம்ஸ் றொட்றிகாஸ் இரண்டு கோல்களையும், டொமினிக் கல்வேர்ட்-லூயின், யெரி மினா ஆகியோர் தலா ஒவ்வொரு கோலையும் பெற்றனர். பிறைட்டன் அன்ட் ஹொவ் அல்பியன் சார்பாக, நீல் மெளபே, யெவ்ஸ் பிஸோமா ஆகியோர் தலா ஒவ்வொரு கோலைப் பெற்றனர்.

இந்நிலையில், செல்சியின் மைதானத்தில் நடைபெற்ற அவ்வணிக்கும் கிறிஸ்டல் பலஸுக்குமிடையிலான போட்டியில் 4-0 என்ற கோல் கணக்கில் செல்சி வென்றது. செல்சி சார்பாக, ஜோர்ஜினியோ இரண்டு கோல்களையும், பென் சில்வெல், கேர்ட் ஸூமா ஆகியோர் தலஅ ஒவ்வொரு கோலையும் பெற்றனர்.