சமநிலையில் பயேர்ண் – அர்மீனியா போட்டி

ஜேர்மனியக் கால்பந்தாட்டக் கழகங்களுக்கிடையிலான புண்டெஸ்லீகா தொடரில், நடப்புச் சம்பியன்களான பயேர்ண் மியூனிச்சின் மைதானத்தில் இன்று அதிகாலை நடைபெற்ற அவ்வணிக்கும், அர்மினியா பிலபெல்டுக்குமிடையிலான போட்டியானது 3-3 என்ற கோல் கணக்கில் சமநிலையில் முடிவடைந்தது.

பயேர்ண் சார்பாக, றொபேர்ட் லெவன்டோஸ்கி, கொரென்டின் டொலிஸோ, அல்போன்ஸோ டேவிஸ் ஆகியோர் தலா ஒவ்வொரு கோலைப் பெற்றனர். அர்மினியா சார்பாக, மிஷெல் விளாப், அமொஸ் பைபர், கிறிஸ்டியன் ஜெபயுயர் ஆகியோர் தலா ஒவ்வொரு கோலைப் பெற்றனர்.

புண்டெலிஸ்கா புள்ளிகள் பட்டியலில், 49 புள்ளிகளுடன் முதலாமிடத்தில் பயேர்ண் உள்ளது. 44 புள்ளிகளுடன் இரண்டாமிடத்தில் ஆர்.பி லெய்ப்ஸிக்கும், 39 புள்ளிகளுடன் மூன்றாமிடத்தில் ஐன்ரச்ட் பிராங்க்பேர்ட்டும், நான்காமிடத்தில் வி.எஃப்.எல் வொல்வ்ஸ்பேர்க்குமுள்ளன. வொல்வ்ஸ்பேர்க்கும் 39 புள்ளிகளையே பெற்றுள்ளபோதும், கோலெண்ணிக்கை அடிப்பைடையில் நான்காமிடத்திலுள்ளது.