தொடர்ந்து முதலிடத்தில் கோலி

சர்வதேச கிரிக்கெட் சபையின் டெஸ்ட் போட்டிகளுக்கான துடுப்பாட்ட வீரர்களுக்கான தரவரிசையில் தொடர்ந்து முதலிடத்தில் இந்திய அணியின் தலைவர் விராத் கோலி காணப்படுகின்றார்.

நேற்று முன்தினம் முடிவுக்கு வந்த இங்கிலாந்துக்கெதிரான நான்காவது டெஸ்டில் இந்தியா தோற்று தொடரை இழந்தபோதும் குறித்த போட்டியில் 104 ஓட்டங்களைப் பெற்ற கோலி டெஸ்ட் போட்டிகளுக்கான துடுப்பாட்ட வீரர்களுக்கான தரவரிசையில் முதலிடத்தில் தொடருவதுடன் தனது வாழ்நாளின் அதிகூடியதான 937 தரப்படுத்தல் புள்ளிகளையும் பெற்றுள்ளார்.

இதேவேளை, குறித்த டெஸ்டின் முதலாவது இனிங்ஸில் சதம் பெற்ற செட்டேஸ்வர் புஜாரா, டெஸ்ட் போட்டிகளுக்கான துடுப்பாட்ட வீரர்களுக்கான தரவரிசையில் ஆறாமிடத்திலேயே தொடருகின்றார்.

அந்தவகையில், முதல் 10 துடுப்பாட்ட வீரர்களின் தரவரிசையில் மாற்றமெதுவும் ஏற்படவில்லை. முதல் 10 துடுப்பாட்ட வீரர்களின் தரவரிசை பின்வருமாறு,

1. விராத் கோலி, 2. ஸ்டீவ் ஸ்மித், 3. கேன் வில்லியம்சன், 4. டேவிட் வோணர், 5. ஜோ றூட், 6. செட்டேஸ்வர் புஜாரா, 7. திமுத் கருணாரத்ன, 8. தினேஷ் சந்திமால், 9. டீன் எல்கர், 10. ஏய்டன் மர்க்ரம்.

இதேவேளை, குறித்த டெஸ்டில் இங்கிலாந்தின் மீள்வருகையை ஆரம்பித்ததுடன் முக்கியமானவராய் அமைந்த சாம் கர்ரன் 124 ஓட்டங்களைப் பெற்றதைத் தொடர்ந்து, டெஸ்ட் போட்டிகளுக்கான துடுப்பாட்ட வீரர்களுக்கான தரவரிசையில் 29 இடங்கள் முன்னேறி 43ஆம் இடத்தை அடைந்துள்ளார். இதுதவிர, இங்கிலாந்தின் இரண்டாவது இனிங்ஸில் 69 ஓட்டங்களைப் பெற்ற ஜொஸ் பட்லர் 15 இடங்கள் முன்னேறி டெஸ்ட் போட்டிகளுக்கான துடுப்பாட்ட வீரர்களுக்கான தரவரிசையில் 32ஆம் இடத்தை அடைந்துள்ளார்.

இந்நிலையில், குறித்த போட்டியில் அவ்வளவாகப் பிரகாசித்திருக்காத இந்திய அணியின் சுழற்பந்துவீச்சாளர் இரவிச்சந்திரன் அஷ்வின் ஓர் இடத்தை இழந்து டெஸ்ட் போட்டிகளுக்கான பந்துவீச்சாளர்களுக்கான தரவரிசையில் எட்டாமிடத்துக்கு கீழிறங்கியுள்ளார். எட்டாமிடத்திலிருந்த ரங்கன ஹேரத் ஏழாமிடத்துக்கு முன்னேறியுள்ளார். முதல் 10 பந்துவீச்சாளர்களின் தரவரிசையில் வேறு எந்தவிதமாற்றமும் ஏற்படவில்லை. முதல் 10 பந்துவீச்சாளர்களின் தரவரிசை பின்வருமாறு,

1. ஜேம்ஸ் அன்டர்சன், 2. கஜிஸோ றபாடா, 3. இரவீந்திர ஜடேஜா, 4. வேர்ணன் பிலாந்தர், 5. பற் கமின்ஸ், 6. ட்ரெண்ட் போல்ட், 7. ரங்கன ஹேரத், 8. இரவிச்சந்திரன் அஷ்வின், 9. நீல் வக்னர், 10. ஜொஷ் ஹேசில்வூட்.

இதேவேளை, குறித்த போட்டியில் 6 விக்கெட்டுகளைக் கைப்பற்றிய இந்திய வேகப்பந்துவீச்சாளர் மொஹமட் ஷமி மூன்று இடங்கள் 19ஆம் இடத்தைப் பிடித்ததுடன், நான்கு விக்கெட்டுகளைக் கைப்பற்றிய இஷாந்த் ஷர்மா ஓர் இடம் முன்னேறி 25ஆம் இடத்தைப் பிடித்துள்ளார்.

இந்நிலையில், குறித்த போட்டியில் 9 விக்கெட்டுகளைக் கைப்பற்றி நாயகனாகத் தெரிவான மொயின் அலி மூன்று இடங்கள் முன்னேறி டெஸ்ட் போட்டிகளுக்கான பந்துவீச்சாளர்களின் தரவரிசையில் 33ஆம் இடத்தைப் பிடித்துள்ளார்.