நியூசிலாந்துக் குழாமில் நீஷம், அஸ்டில்

இந்தியாவுக்கெதிரான நான்காவது, ஐந்தாவது ஒருநாள் சர்வதேசப் போட்டிகளுக்கான நியூசிலாந்துக் குழாமில் சகலதுறை வீரர்கள் ஜேம்ஸ் நீஷம், டொட் அஸ்டில் ஆகியோர் இடம்பெற்றுள்ளனர்.

ஐந்து போட்டிகள் கொண்ட குறித்த ஒருநாள் சர்வதேசப் போட்டித் தொடரின் முதல் மூன்று போட்டிகளிலும் தோல்வியைத் தளுவிய நியூசிலாந்து தொடரை ஏற்கெனவே இழந்துள்ள நிலையில், குறித்த போட்டிகளுக்கான நியூசிலாந்துக் குழாமில் இடம்பெற்றிருந்த வேகப்பந்துவீச்சு சகலதுறைவீரர் டவ் பிறேஸ்வெல், சுழற்பந்துவீச்சாளர் இஷ் சோதி ஆகியோரையே குழாமில் நீஷமும் அஸ்டிலும் பிரதியிட்டுள்ளனர்.

இம்மாத ஆரம்பத்தில் இடம்பெற்ற இலங்கைக்கெதிரான ஒருநாள் சர்வதேசப் போட்டித் தொடரில் பங்கேற்றிருந்த நீஷம், பின்தொடை தசைநார் உபாதைக்குள்ளாகி தற்போது உள்ளூர் இருபதுக்கு – 20 போட்டித் தொடரில் விளையாடி தனது உடற்றகுதியைத் நிரூபித்தே தொடரில் இடம்பிடித்துள்ளார்.

இதேபோல், கடந்தாண்டு நவம்பரிலிருந்து முழங்காய் காயமொன்று காரணமாக போட்டிகளில் பங்கேற்றிருக்காத அஸ்டிலும், குறித்த உள்ளூர் இருபதுக்கு – 20 போட்டித் தொடரில் விளையாடியே குழாமில் இடம்பிடித்துள்ளார்.

குழாம்: கேன் வில்லியம்சன் (அணித்தலைவர்), டொட் அஸ்டில், ட்ரெண்ட் போல்ட், கொலின் டி கிரான்ட்ஹொம், லொக்கி பெர்கியூசன், மார்டின் கப்தில், மற் ஹென்றி, டொம் லேதம் (விக்கெட் காப்பாளர்), கொலின் மன்றோ, ஜேம்ஸ் நீஷம், ஹென்றி நிக்கொல்ஸ், மிற்செல் சான்ட்னெர், டிம் செளதி, றொஸ் டெய்லர்.