பாடசாலை ரக்பி ‘ராஜாக்களின்’ 2026 பருவக்காலத் தொடக்கம்

இலங்கை பாடசாலை ரக்பி விளையாட்டில் 'பசுமை இயந்திரம்' (Green Machine) என வர்ணிக்கப்படும் கொழும்பு இசிபத்தன கல்லூரியின் 2026ஆம் ஆண்டிற்கான ரக்பி பருவக்காலத் தொடக்கம் மற்றும் அனுசரணையாளர்களைக் கௌரவிக்கும் நிகழ்வு நேற்று (09.04.2026) கொழும்பு கிராண்ட் பெல் ஹோட்டலில் நடைபெற்றது.

அனுசரணையாளர்கள் மற்றும் சீருடை அறிமுகம்:

இந்த ஆண்டுக்கான இசிபத்தன கல்லூரியின் ரக்பி பயணத்திற்கு வில்மார்ட் (Wilmar), டயலொக் (Dialog), மாஸ் ஹோல்டிங்ஸ் (MAS), கே.எப்.சி (KFC) உள்ளிட்ட 14 முன்னணி நிறுவனங்கள் அனுசரணை வழங்குகின்றன. நிகழ்வின் போது வீரர்களுக்கான புதிய சீருடைகள் (T-Shirts) அறிமுகப்படுத்தப்பட்டதுடன், அனுசரணையாளர்களுக்கு நன்றியறிதல்களும் கௌரவிப்புகளும் வழங்கப்பட்டன. பழைய மாணவர் ரக்பி குழுவின் முயற்சியால் சுமார் 8 கோடி ரூபாவிற்கும் அதிகமான செலவில் இவ்வாண்டுக்கான ரக்பி திட்டங்கள் முன்னெடுக்கப்பட்டுள்ளன.

போட்டி விபரங்கள்:

தற்போது கொழும்பு ரேவலக்டவுன் (Havelock Town) மைதானத்தில் 18 பாடசாலைகளுக்கு இடையிலான ரக்பி போட்டிகள் ஏ, பி, சி என மூன்று பிரிவுகளாக நடைபெற்று வருகின்றன. இதன்படி, 'ஏ' பிரிவில் விளையாடும் இசிபத்தன கல்லூரி அணி, எதிர்வரும் ஏப்ரல் 25இல் புனித அந்தோனியார் கல்லூரியுடனும், மே 02இல் டி.எஸ். சேனாநாயக்க கல்லூரியுடனும், மே 10இல் ஸ்ரீ சுமங்கல கல்லூரியுடனும் மற்றும் மே 24இல் கண்டி திரித்துவக் கல்லூரியுடனும் மோதவுள்ளது.

தலைமைத்துவம் மற்றும் பயிற்சிக் குழு:

2026ஆம் ஆண்டு பருவத்திற்கான இசிபத்தன அணிக்கு ஷாகிப் ஜும்ரி (Shaquib Zumri) தலைமை தாங்குகிறார். நிமதா சந்தீபா மற்றும் அப்துல் அஜீஸ் ஆகியோர் துணைத் தலைவர்களாகச் செயற்படுவர். நீண்ட இடைவெளிக்குப் பிறகு புகழ்பெற்ற பயிற்றுவிப்பாளர் சனத் மார்டிஸ் மீண்டும் தலைமைப் பயிற்சியாளராகப் பொறுப்பேற்றுள்ளார். இவருக்கு ஆலோசனைகளை வழங்க ஃபிஜி நாட்டின் முன்னாள் சர்வதேச வீரர் சைமோனி ரோகினி (Simoni Rokini) இணைந்துள்ளார்.

வரலாற்றுச் சாதனை:

1960இல் ஆரம்பிக்கப்பட்ட இசிபத்தன ரக்பி குழு, 1963இல் முதன்முறையாகத் தேசிய ரீதியில் வெற்றி பெற்றது. இன்றுவரை 14 முறை ஜனாதிபதி கிண்ணத்தையும், 14 முறை லீக் மற்றும் நொக்-அவுட் சம்பியன் பட்டங்களையும் வென்று ஈடு இணையற்ற சாதனையைப் படைத்துள்ளது. தில்ராய் பெர்னாண்டோ, நிஜாம் ஜமால்தீன் போன்ற புகழ்பெற்ற நடுவர்களையும், 70க்கும் மேற்பட்ட தேசிய வீரர்களையும் இக்கல்லூரி உருவாக்கியுள்ளது.

தலைவர் மற்றும் அதிபர் உரை:

நிகழ்வில் உரையாற்றிய ரக்பி பழைய மாணவர் குழுவின் தலைவர் கலும் ரோட்ரிகோ மற்றும் கல்லூரியின் அதிபர் எம். தர்சன ஆகியோர், "வீரர்கள், பயிற்சியாளர்கள் மற்றும் பழைய மாணவர்களின் கூட்டு முயற்சியே இசிபத்தனவின் தொடர் வெற்றிகளுக்குக் காரணம்" எனக் குறிப்பிட்டனர். வில்மா நிறுவனத்தின் சந்தைப்படுத்தல் முகாமையாளரும் இதன்போது சிறப்புரையாற்றினார்.

நன்றி: அஷ்ரப் ஏ. சமத்