’பேட்டில் ஒப் லிட்டில் இங்கிலாந்து’: காமினி தேசிய பாடசாலை வரலாற்று வெற்றி

'லிட்டில் இங்கிலாந்து' (Little England) என வர்ணிக்கப்படும் நுவரெலியாவின் பாரம்பரியமிக்க கிரிக்கெட் சமரான 'பேட்டில் ஒப் லிட்டில் இங்கிலாந்து' (Battle of Little England) கிண்ணத்தை நுவரெலியா காமினி தேசிய பாடசாலை அணி கைப்பற்றியது.

பரிசுத்த திரித்துவ மத்திய கல்லூரி மற்றும் காமினி தேசிய பாடசாலை அணிகள் மோதிய 4-வது வருடாந்த மூன்று நாள் கொண்ட கடினபந்து கிரிக்கெட் போட்டி, நுவரெலியா மாநகர சபை மைதானத்தில் அண்மையில் நடைபெற்றது.

போட்டியின் ஆரம்பம்:

போட்டியின் ஆரம்ப நிகழ்வில் நுவரெலியா மாவட்ட மேலதிக செயலாளர் சாலிகா லிந்தகும்பர, வலயக் கல்விப் பணிப்பாளர் மற்றும் இரு பாடசாலைகளின் அதிபர்கள் ஆகியோர் கலந்துகொண்டு போட்டியை ஆரம்பித்து வைத்தனர். நாணயச் சுழற்சியில் வெற்றி பெற்ற பரிசுத்த திரித்துவ மத்திய கல்லூரி அணி முதலில் துடுப்பெடுத்தாடத் தீர்மானித்தது.

முதல் இன்னிங்ஸ்:

பரிசுத்த திரித்துவ மத்திய கல்லூரி அணி தனது முதல் இன்னிங்ஸில் அனைத்து விக்கெட்டுகளையும் இழந்து 141 ஓட்டங்களைப் பெற்றது. பதிலுக்கு முதல் இன்னிங்ஸைத் தொடர்ந்த காமினி தேசிய பாடசாலை அணி, இரண்டாம் நாள் ஆட்ட முடிவில் 5 விக்கெட்டுகளை இழந்து 208 ஓட்டங்களைக் குவித்திருந்தது. துடுப்பாட்டத்தில் சதேவ் 51 ஓட்டங்களையும், தஹம் செனவிரத்ன மற்றும் அணித்தலைவர் கீதாஞ்சன ஆகியோர் தலா 42 ஓட்டங்களையும் பெற்றனர்.
பந்துவீச்சில் திரித்துவ மத்திய கல்லூரி சார்பில் செபஸ்டியன் 2 விக்கெட்டுகளைக் கைப்பற்றினார்.

இரண்டாவது இன்னிங்ஸ் மற்றும் வெற்றி:

மூன்றாம் நாள் ஆட்டத்தின் போது, காமினி தேசிய பாடசாலை அணி தனது முதல் இன்னிங்ஸை 208 ஓட்டங்களுடன் இடைநிறுத்தி (Declared), திரித்துவ மத்திய கல்லூரிக்கு இரண்டாவது இன்னிங்ஸிற்காக வாய்ப்பளித்தது.

இரண்டாவது இன்னிங்ஸில் துடுப்பெடுத்தாடிய திரித்துவ மத்திய கல்லூரி அணி 140 ஓட்டங்களுக்குள் சுருண்டது. அந்த அணி சார்பில் ரிஷாந்தன் அதிகபட்சமாக 54 ஓட்டங்களைப் பெற்றார். காமினி அணி சார்பில் தனுஜன் மற்றும் நிமேஷ் ஆகியோர் தலா 3 விக்கெட்டுகளை வீழ்த்தினர்.

இதனைத் தொடர்ந்து 73 ஓட்டங்கள் என்ற வெற்றி இலக்குடன் களமிறங்கிய காமினி தேசிய பாடசாலை அணி, விக்கெட் இழப்பின்றி இலக்கை எட்டி அபார வெற்றி பெற்றதுடன், 2026-ஆம் ஆண்டுக்கான 'பேட்டில் ஒப் லிட்டில் இங்கிலாந்து' கிண்ணத்தையும் சுவீகரித்தது.

விருது விபரங்கள்:

சிறந்த துடுப்பாட்ட வீரர்: ரிதுர்சான் (பரிசுத்த திரித்துவ மத்திய கல்லூரி)
சிறந்த பந்துவீச்சாளர்: தனுஜன் (காமினி தேசிய பாடசாலை)
சிறந்த களத்தடுப்பாளர்: சதுர்ஸ்வரன் (பரிசுத்த திரித்துவ மத்திய கல்லூரி)
வளர்ந்து வரும் சிறந்த வீரர்: அஸ்வின் (பரிசுத்த திரித்துவ மத்திய கல்லூரி)

 கஜரூபன் திவ்யா