பிரான்ஸை வீழ்த்திய ஜேர்மனி

சிநேகபூர்வப் போட்டிகளில், தம் நாட்டில் நேற்று அதிகாலை நடைபெற்ற ஜேர்மனியுடனான போட்டியில் 0-2 என்ற கோல் கணக்கில் பிரான்ஸ் தோற்றது.

ஜேர்மனி சார்பாக, புளோரியன் ரிட்ஸ், கை ஹவேர்ட்ஸ் ஆகியோர் தலா ஒவ்வொரு கோலைப் பெற்றனர்.

இதேவேளை, இங்கிலாந்தில் நடைபெற்ற அவ்வணியுடனான போட்டியில் 1-0 என்ற கோல் கணக்கில் பிரேஸில் வென்றது. பிரேஸில் சார்பாகப் பெறப்பட்ட கோலை என்ட்ரிக் பெற்றிருந்தார்.

இந்நிலையில், எகிப்தில் நடைபெற்ற குரோஷியா, துனீஷியாவுக்குமிடையிலான போட்டியானது வழமையான நேரத்தில் 0-0 என்ற கோல் கணக்கில் சமநிலையில் முடிவடைந்த நிலையில், பெனால்டியில் 5-4 என்ற ரீதியில் குரோஷியா வென்றது.

இதேவேளை டென்மார்க்கில் நடைபெற்ற அவ்வணிக்கும், சுவிற்ஸர்லாந்துக்குமிடையிலான போட்டியானது 0-0 என்ற கோல் கணக்கில் சமநிலையில் முடிவடைந்தது.

இந்நிலையில், தம் நாட்டில் நேற்று முன்தினமிரவு நடைபெற்ற பெல்ஜியத்துடனான போட்டியை 0-0 என்ற கோல் கணக்கில் அயர்லாந்து சமப்படுத்தியது.