முதற்சுற்றில் நடாலுக்கு அதிர்ச்சித் தோல்வி

அவுஸ்திரேலிய பகிரங்க டென்னிஸ் தொடரில், உலகின் 5ஆம் நிலை வீரரான ஸ்பெய்னின் ரபேல் நடால், முதற்சுற்றிலேயே அதிர்ச்சித் தோல்வியடைந்து வெளியேறினார்.

சகநாட்டு வீரரான பெர்ணான்டோ வேர்டஸ்கோவை எதிர்கொண்ட அவர், முதலாவது செட்டை 6-7 என்ற கணக்கில் இழந்த போதிலும், அடுத்த இரண்டு செட்களை 6-4, 6-3 என்ற கணக்கில் கைப்பற்றினார்.

ஆனாலும், அடுத்த செட்டை 7-6 என்ற கணக்கில் கைப்பற்றிய வேர்டஸ்கோ, தீர்க்கமான 5ஆவது செட்டில் 0-2 என்ற புள்ளிகள் கணக்கில் பின்தங்கியிருந்த போதிலும், தொடர்ந்து போராடி, 6-2 என்ற புள்ளிகள் கணக்கில் அந்த செட்டைக் கைப்பற்றி, இப்போட்டியில் வெற்றிபெற்றார்.

இதேவேளை   2ஆம் நிலை வீராங்கனையான ரோமானியாவின் சிமோனா ஹலெப்,  4-6, 3-6 என்ற செட் கணக்கில் தரவரிசையில் 133ஆவது இடத்திலுள்ள சீனாவின் ஸங் ஷ்சுவாயையிடம் அதிர்ச்சி தோல்வியுற்றார்.

ஏற்கெனவே, பெண்கள் ஒற்றையர் பிரிவில் 10ஆம் நிலை வீராங்கனையான வீனஸ் வில்லியம்ஸ், 4-6, 2-6 என்ற செட் கணக்கில், ஐக்கிய இராச்சியத்தைச் சேர்ந்த ஜொஹன்னா கொன்டாவிடம் தோல்வியடைந்த நிலையில், இரண்டாம் நாளில் பெறப்பட்ட மூன்றாவது அதிர்ச்சி முடிவாக இது அமைந்தது.

இடம்பெற்ற ஏனைய போட்டிகளில், 2ஆம் நிலை வீரர் அன்டி மரே, ஜேர்மனியின் அலெக்ஸான்டர் ஸ்வெரெவை 6-1, 6-2, 6-3 என்ற செட் கணக்கில் வீழ்த்தினார். 3ஆம் நிலை வீராங்கனையான ஸ்பெய்னின் கார்பினே முகுருஸா, எஸ்தோனியாவின் அனெட் கொன்டவெய்ட்டை 6-0, 6-4 என்ற செட் கணக்கில் வீழ்த்தி, பெற்றிபெற்றார்.