மூனியின் அபார மீட்பால் வென்ற அவுஸ்திரேலியா

பெண்களின் உலகக் கிண்ணத்தில், பெத் மூனியின் அபார மீட்பால் பாகிஸ்தானை அவுஸ்திரேலியா வென்றது.

கொழும்பு ஆர் பிரேமதாஸ மைதானத்தில் புதன்கிழமை (08) நடைபெற்ற இப்போட்டியில் முதலில் துடுப்பெடுத்தாடப் பணிக்கப்பட்ட அவுஸ்திரேலியா, சாடியா இக்பால், அணித்தலைவி பாத்திமா சனா, நஷ்ரா சந்து (3), றமீன் ஷமிம் (2), டியானா பைக்கிடம் வரிசையாக விக்கெட்டுகளைப் பறிகொடுத்து 33.5 ஓவர்களில் 8 விக்கெட்டுகளை இழந்து 115 ஓட்டங்களைப் பெற்றுத் தடுமாறிய நிலையில் பெத் மூனியின் 109 (114), அலானா கிங்கின் ஆட்டமிழக்காத 51 (49) ஓட்டங்களுடனே 50 ஓவர்களில் 9 விக்கெட்டுகளை இழந்து 221 ஓட்டங்களைப் பெற்றது.

பதிலுக்கு 222 ஓட்டங்களை வெற்றியிலக்காகக் கொண்டு துடுப்பெடுத்தாடிய பாகிஸ்தான், கிம் கார்த் (3), மேகன் ஸ்கட் (2), அனபெல் சதர்லேண்ட் (2), அஷ்லெய் கார்ட்னர், ஜோர்ஜியா வரென்ஹாம், அலானா கிங்கிடம் விக்கெட்டுகளைப் பறிகொடுத்து 36.3 ஓவர்களில் சகல விக்கெட்டுகளையும் இழந்து 114 ஓட்டங்களையே பெற்று 107 ஓட்டங்களால் தோல்வியடைந்தது.  சிட்ரான் அமின் 35 (52) ஓட்டங்களைப் பெற்றார்.

இப்போட்டியின் நாயகியாக பெத் மூனி தெரிவானார்.