மேற்கிந்தியத் தீவுகளிடம் தோற்ற பாகிஸ்தான்

மேற்கிந்தியத் தீவுகளுடனான இரண்டாவது ஒருநாள் சர்வதேசப் போட்டியில் பாகிஸ்தான் தோற்றது.

மூன்று போட்டிகள் கொண்ட இத்தொடரின் முதலாவது போட்டியில் பாகிஸ்தான் வென்றிருந்த நிலையில், ட்ரினிடாட்டில் ஞாயிற்றுக்கிழமை (10) நடைபெற்ற இரண்டாவது போட்டியின் நாணயச் சுழற்சியில் வென்ற மேற்கிந்தியத் தீவுகளின் அணித்தலைவர் ஷே ஹோப் தமதணி முதலில் களத்தடுப்பிலீடுபடுமென அறிவித்தார்.

அந்தவகையில் முதலில் துடுப்பெடுத்தாடிய பாகிஸ்தான், ஜேடன் சியல்ஸ் (3), ஜெடியாஹ் பிளேட்ஸ், குடகேஷ் மோட்டி, றொஸ்டன் சேஸ், ஷாமர் ஜோசப்பிடம் குறிப்பிட்ட இடைவெளிகளில் விக்கெட்டுகளை பறிகொடுத்த வண்ணமிருந்து மூன்று தடவைகள் மழை குறுக்கிட்டு 37 ஓவர்களுடன் இனிங்ஸ் முடிவுக்கு வந்த நிலையில் 7 விக்கெட்டுகளை இழந்து 171 ஓட்டங்களைப் பெற்றது. ஹஸன் நவாஸ் ஆட்டமிழக்காமல் 36 (30), ஹுஸைன் தலாட் 31 (32) ஓட்டங்களைப் பெற்றனர்.

பதிலுக்கு டக்வேர்த் லூயிஸ் ஸ்டேர்ன் முறைப்படி 35 ஓவர்களில் 181 ஓட்டங்களை வெற்றியிலக்காகக் கொண்டு துடுப்பெடுத்தாடிய மேற்கிந்தியத் தீவுகள் ஆரம்பத்திலேயே ஹஸன் அலியின் அடுத்தடுத்த ஓவர்களில் பிரெண்டன் கிங், எவின் லூயிஸைப் பறிகொடுத்தது. சிறிது நேரத்தில் பின்னர் கேசி காட்டியையும் அப்ரார் அஹ்மட்டிடம் இழந்தது.

இந்நிலையில் ஹோப்பும், ஷெர்ஃபேன் ருதஃபோர்ட்டின் இணைப்பாட்டத்தில் வெற்றியிலக்கை நோக்கி மேற்கிந்தியத் தீவுகள் நகர்ந்த நிலையில், ஹோப் 32 (35) ஓட்டங்களுடனும் ருதஃபோர்ட் 45 (33) ஓட்டங்களுடனும் மொஹமட் நவாஸின் அடுத்தடுத்த ஓவர்களில் வீழ்ந்தனர்.

எனினும் தொடர்ந்து வந்த சேஸின் ஆட்டமிழக்காத 49 (47), ஜஸ்டின் கிரேவ்ஸின் ஆட்டமிழக்காத 26 (31) ஓட்டங்களோடு 33.2 ஓவர்களில் 5 விக்கெட்டுகளை இழந்த நிலையில் வெற்றியிலக்கை மேற்கிந்தியத் தீவுகள் அடைந்தது.

இப்போட்டியின் நாயகனாக சேஸ் தெரிவானார்.