மேற்கிந்தியத் தீவுகளை வீழ்த்திய ஆப்கானிஸ்தான்

மேற்கிந்தியத் தீவுகளுக்கெதிரான முதலாவது இருபதுக்கு – 20 சர்வதேசப் போட்டியில் ஆப்கானிஸ்தான் வென்றது.

மூன்று போட்டிகள் கொண்ட இத்தொடரில், ஐக்கிய அரபு அமீரகத்தின் டுபாயில் திங்கட்கிழமை (19) நடைபெற்ற இப்போட்டியின் நாணயச் சுழற்சியில் வென்ற ஆப்கானிஸ்தானின் அணித்தலைவர் ரஷீட் கான் தமதணி முதலில் துடுப்பெடுத்தாடுமென அறிவித்தார்.

அந்தவகையில் முதலில் துடுப்பெடுத்தாடிய ஆப்கானிஸ்தான், இப்ராஹிம் ஸட்ரானின் ஆட்டமிழக்காத 87 (56), டர்விஷ் ரசூலியின் 84 (59) ஓட்டங்களோடு 20 ஓவர்களில் 3 விக்கெட்டுகளை இழந்து 181 ஓட்டங்களைப் பெற்றது. பந்துவீச்சில் ஜேடன் சியல்ஸ் 4-0-30-1, குடகேஷ் மோட்டி 4-0-18-0 என்ற பெறுதிகளைக் கொண்டிருந்தனர்.

பதிலுக்கு 182 ஓட்டங்களை வெற்றியிலக்காகக் கொண்டு துடுப்பெடுத்தாடிய மேற்கிந்தியத் தீவுகள், முஜீப் உர் ரஹ்மான் (2), ஸியாவுர் ரஹ்மன் (3), ரஷீட் (2), நூர் அஹ்மட்டிடம் (2) விக்கெட்டுகளைப் பறிகொடுத்து 20 ஓவர்களில் 9 விக்கெட்டுகளை இழந்து 143 ஓட்டங்களைப் பெற்றது. குயென்டின் சாம்ப்சன் 30 (24), குடகேஷ் மோட்டி 28 (15), ஜோன்சன் சார்ள்ஸ் 27 (16), மத்தியூ போர்டே 25 (21) ஓட்டங்களைப் பெற்றனர்.

இப்போட்டியின் நாயகனாக ரசூலி தெரிவானார்.