யுனைட்டெட்டை வென்ற மியூனிச்

ஐரோப்பிய கால்பந்தாட்டச் சங்கங்களின் ஒன்றியத்தின் சம்பியன்ஸ் லீக் தொடரில், தமது மைதானத்தில் நேற்று அதிகாலை நடைபெற்ற இங்கிலாந்து பிறீமியர் லீக் கழகமான மன்செஸ்டர் யுனைட்டெட்டுடனான போட்டியில் 4-3 என்ற கோல் கணக்கில் ஜேர்மனிய புண்டெஸ்லிகா கழகமான பயேர்ண் மியூனிச் வென்றது.

மியூனிச் சார்பாக, லெரோய் சனே, சேர்ஜி நர்பி, ஹரி கேன், மத்திஸ் டெல் ஆகியோர் தலா ஒவ்வொரு கோலைப் பெற்றனர். யுனைட்டெட் சார்பாக கஸேமீரோ இரண்டு கோல்களையும், றஸ்முஸ் ஹொஜ்லுன்ட் ஒரு கோலையும் பெற்றனர்.

இதேவேளை, ஸ்பானிய லா லிகா கழகமான றியல் சொஸைடட்டின் மைதானத்தில் நடைபெற்ற அவ்வணிக்கும், இத்தாலிய சீரி ”ஏ” கழகமான இன்டர் மிலனுக்குமிடையிலான போட்டியானது 1-1 என்ற கோல் கணக்கில் சமநிலையில் முடிவடைந்தது.