லெய்ப்ஸிக்கிடம் தோற்ற சிற்றி

ஐரோப்பிய கால்பந்தாட்டச் சங்கங்களின் ஒன்றியத்தின் சம்பியன்ஸ் லீக் தொடரில், ஜேர்மனிய புண்டெலிஸ்கா கழகமான ஆர்.பி லெய்ப்ஸிக்கின் மைதானத்தில் நேற்றிரவு நடைபெற்ற அவ்வணியுடனான குழு ஏ போட்டியில் 1-2 என்ற கோல் கணக்கில் இங்கிலாந்து பிறீமியர் லீக் கழகமான மன்செஸ்டர் சிற்றி தோற்றது.

சிற்றி சார்பாகப் பெறப்பட்ட கோலை றியாட் மஹ்ரேஸ் பெற்றதோடு, லெய்ப்ஸிக் சார்பாக, டொமினிக் ஸ்பொஸ்லாய், அன்ட்ரே சில்வா ஆகியோர் தலா ஒவ்வொரு கோலைப் பெற்றனர்.

இதேவேளை, ஸ்பானிய லா லிகா கழகமான றியல் மட்ரிட்டின் மைதானத்தில் இன்று அதிகாலை நடைபெற்ற அவ்வணியுடனான குழு டி போட்டியில் 0-2 என்ற கோல் கணக்கில் இத்தாலிய சீரி ஏ கழகமான இன்டர் மிலன் தோற்றது. றியல் மட்ரிட் சார்பாக, டொனி க்றூஸ், மார்கோ அஸென்ஸியோ ஆகியோர் தலா ஒவ்வொரு கோலைப் பெற்றனர்.

இந்நிலையில், சீரி ஏ கழகமான ஏ.சி மிலனின் மைதானத்தில் நடைபெற்ற அவ்வணியுடனான குழு பி போட்டியில் 2-1 என்ற கோல் கணக்கில் லிவர்பூல் வென்றது. லிவர்பூல் சார்பாக, மொஹமட் சாலா, டிவோக் ஒரிஜி ஆகியோர் தலா ஒவ்வொரு கோலைப் பெற்றதோடு, மிலன் சார்பாகப் பெறப்பட்ட கோலை பிகாயோ டொமோரி பெற்றிருந்தார்.

இதேவேளை, போர்த்துக்கல் கழகமான போர்ட்டோவின் மைதானத்தில் நடைபெற்ற அவ்வணியுடனான குழு பி போட்டியில் 3-1 என்ற கோல் கணக்கில் வென்ற லா லிகா கழகமான அத்லெட்டிகோ மட்ரிட், விலகல் முறையிலான சுற்றுக்குத் தகுதி பெற்றது. மட்ரிட் சார்பாக, அந்தோனி கிறீஸ்மன், ஏஞ்சல் கொரேரா, யனிக் கராஸ்கோ ஆகியோர் தலா ஒவ்வொரு கோலைப் பெற்றனர். போர்ட்டோ சார்பாகப் பெறப்பட்ட கோலை சேர்ஜியோ ஒலிவெய்ரா பெற்றார்.